Avropa

Ana səhifə

Avropa

Avropa Şurasının İnsan Hüquqları üzrə yeni Komissarı Nils Muiznieks aprelin 1-dən vəzifəsinin icrasına başlayıb

01 aprel 2012 05:13 (UTC +04:00)

Fuad Qulubəyli-APA. Latviyalı Nils Muiznieks aprelin 1-dən etibarən Avropa Şurası İnsan Hüquqları üzrə yeni Komissarı kimi vəzifəsinin icrasına başlayıb. AŞPA-nın ötən qış sessiyası çərçivəsində AŞ-nın İnsan Hüquqları üzrə Komissarı vəzifəsinə seçilmiş Nils Muiznieks, Alvaro Gil-Robles (1999-2006) və Tomas Hammarberqdən (2006-2012) sonra təşkilatın sayca 3-cü komissarıdır.
Komissarlığın ofisi tərəfindən yayılan bəyanatda, yeni komissar 6 illik mandatı ərzində əsasən komissarlığın müstəqilliyi və qərərsizliyinin qorunub saxlanması vacibliyini vurğulayıb.
"Üzv dövlətlərdə insan hüquqlarının tam həyata keçirilməsi və onlara effektiv şəkildə riayət olunmasında komissarlıq ofisinin verə biləcəyi töhfəni inkişaf etdirmək üçün mən də bu vaxta qədər görülmüş işlərə arxalanmaq niyyətindəyəm. Bu mandat çərçivəsində, Ofisimizin müstəqilliyi və qərərsizliyinin qorunub saxlanması olduqca vacibdir. Bundan başqa, mən də həmçinin ölkələr və əsas mövzular üzrə qurumun monitorinq fəaliyyətini davam etdirəcəm və bu fəaliyyətim zamanı əsas diqqətimi daha çox uşaqlar, yaşlı və əlil şəxslər kimi həssas qruplara yetirəcəm. İqtisadi böhranın insan hüquqlarının qorunmasını zəiflətdiyi bir dönəmdə, bu olduqca vacib məsələdir". Bundan əlavə, yeni Komissar miqrantların, xüsusən də sığınacaq istəyən şəxslər və qaçqınların insan hüquqlarının qorunmasına böyük diqqət ayıracağını bildirib. Eyni zamanda, qadın hüquqları və kişi və qadın bərabərliyi, azsaylı xalqların hüquqları, mətbuat azadlığı, şəxsi bilgilərin qorunması, sosial şəbəkələr və məlumat sahəsində insan hüquqları normalarına riayət edilməsi vacibliyi də yeni Komissarın əsas fəaliyyət istiqaməti olacaq.
Nils Muiznieks üzv dövlətlərdə struktur çatışmamazlıqlarını nəzərdən keçirmək məqsədi ilə, insan hüquqları sahəsindəki milli qurumlarla da əməkdaşlığı gücləndirmək niyyətindədir.
Xatırladaq ki, AŞ-nın İnsan hüquqları üzrə Komissarı olmuş Tomas Hammarberqin mandatının vaxtı bu ilin martın 31-də bitib və onun bu vəzifəyə yenidən seçilmək hüququ yox idi.
Onu da qeyd edək ki, Nils Muiznieks 2005-ci ildən Avropa Şurasında işləyir, 2010-cu ildən etibarən AŞ-nın İrqçilik və dözümsüzlüyə qarşı Avropa Komissiyasının sədri vəzifəsində çalışıb.