Avstraliya hökuməti ABŞ-ın "WikiLeaks" saytının yaradıcısı Culian Assanjı azad etməsi üçün çalışacaq.
APA xəbər verir ki, Avstraliyanın Baş naziri Entoni Albaneze jurnalistlərə açıqlamasında müvafiq bəyanatla çıxış edib.
Onun fikrincə, WikiLeaks-in yaradıcısının həbsi çox uzun sürdü və Avstraliya Assanjın azad edilməsi üçün yolların axtarılmasını davam etdirmək niyyətindədir.
Avstraliya hökumətinin başçısı onu da qeyd edib ki, Assanjın ABŞ-a ekstradisiyası ilə bağlı onun və Avstraliya hökumətinin mövqeyi dəyişməz olaraq qalır.
Xatırladaq ki, "WikiLeaks" saytının yaradıcısı Culian Assanj 2019-cu ilin 11 aprelində Britaniya polisi tərəfindən Ekvadorun Londondakı səfirliyində həbs olunub.
Assanj 2012-ci ildə zorlama ittihamı ilə həbs olunaraq İsveçə verilməsindən ehtiyat edərək Ekvador səfirliyinə sığınıb. Assanjın sözlərinə görə, İsveçin onu ABŞ-a təhvil verəcəyi halda onu ölüm hökmü gözləyir. Buna səbəb isə Assanjın yaratdığı "WikiLeaks" saytının Pentaqonun məxfi sənədlərini və müxtəlif gizli yazışmaları yaymasıdır.