ABŞ-ın şərq sahillərində “İsaias” tropik qasırğası nəticəsində ölənlərin sayı 4 nəfərə çatıb.
APA xəbər verir ki, bu barədə “ABC” telekanalı yerli hakimiyyət orqanlarına istinadən məlumat yayıb.
Məlumata görə, Merilend və Nyu-Yorkda iki nəfər ölüb. Buna qədər Şimali Karolina ştatında baş verən tornado zamanı iki nəfərin ölməsi barədə məlumat verilmişdi. Rəsmi qurumlar Şimali Karolinadan Nyu-Cersiyə qədər şərq sahilləri boyunca 21 tornado qeydə alıblar.
“İsaias” ABŞ-ın doqquz ştatında 3 milyondan çox sakini elektrik enerjisindən məhrum edib.
Qeyd edək ki, “İsaias” qasırğası Şimali Karolinada bazar ertəsi günü meydana gəlib. Hazırda o, tropik qasırğa həddinədək zəifləyib.