Ayətullah Əli Xamenei Qətər əmiri ilə bölgədəki vəziyyəti müzakirə edib

Ayətullah Əli Xamenei Qətər əmiri ilə bölgədəki vəziyyəti müzakirə edib
  • Clock-gray 21:06
  • calendar-gray 12 Yanvar 2020

 

Bölgədə hazırkı vəziyyət onu göstərir ki, region ölkələri arasında əlaqələrin daha da gücləndirilməsinə və  onların əcnəbilərin təsiri altına düşməməsinə daha çox ehtiyac var. 

APA-nın Tehran bürosunun məlumatına görə, bu fikri İranın Ali Lideri Ayətullah Əli Xamenei Tehranda səfərdə olan Qətər əmiri Tamim bin Hamad Al Tani ilə görüşündə bildirib.

“İran İslam Respublikası dəfələrlə elan edib, şəxsən cənab prezident açıq şəkildə bunu bildirib ki, İran region ölkələri ilə  daha yaxından əməkdaşlıq etməyə hazırdır. Bölgədə hazırkı şəraitdə  vəziyyət əlverişsizdir. Bunun səbəbi  ABŞ və onun dostlarının fitnəsidir. Onlarla yeganə mübarizə yolu bölgə daxilində əməkdaşlığa söykənməkdir”, - deyə Xamenei qeyd edib.

İran və Qətər arasında  siyasi əlaqələrin yaxşı səviyyədə olduğunu deyən Ayətullah Xamenei diqqətə çatdırıb ki, iki ölkə arasındakı iqtisadi əlaqələr  siyasi əlaqələr səviyyəsində deyil: “İki ölkə müştərək sahələrdə əməkdaşlıqlarını artırmalıdır. Əlbətə bəziləri, xüsusilə dünyanın o başından bölgəyə gələnlər region ölkələri arasında əlaqələrin inkişaf etdirilməsində maraqlı deyillər. Lakin bu məsələnin onlara aidiyyəti yoxdur. Bölgə xalqları və  ölkələri daha bu cür müdaxilələri qəbul etmirlər”.

Görüşdə Qətər əmiri Xamenei ilə görüşdən məmnunluğunu dilə gətirib və bildirib ki, bölgə ölkələri arasında əməkdaşlığın artırılması ilə bağlı fikirlərlə tamamilə razıdır: “Düşünürəm ki, bölgə ölkələri arasında  kompleks danışıqlar aparılmalıdır”.

Qətər əmiri deyib ki, Tehrandakı danışıqlarda razılaşdıq ki, 3 aydan sonra iki ölkənin müştərək iqtisadi komissiyasının İranda iclası keçirilsin: “Ümid edirəm, İran və  Qətər arasında iqtisadi əlaqələr siyasi əlaqələr qədər inkişaf edəcək”. 

Qətərin əmiri danışıqlar əsnasında ölkəsinə qarşı sanksiyalar tətbiq edilərkən İranın yardımlarına görə Ali Liderə təşəkkür edib.

 

Süleyman Fərzəliyev

Digər xəbərlər