Dağlıq Qarabağ

Ana səhifə

Dağlıq Qarabağ

Azərbaycan və Rusiya prezidentləri Dağlıq Qarabağ ətrafında vəziyyəti müzakirə edib - YENİLƏNİB

01 aprel 2021 16:16 (UTC +04:00)

Aprelin 1-də Azərbaycan Respublikasının Prezidenti İlham Əliyev ilə Rusiya Federasiyasının Prezidenti Vladimir Putin arasında telefon danışığı olub.

APA-nın məlumatına görə, Azərbaycan Prezidentinin mətbuat xidmətinin yaydığı məlumatda bildirilir ki, telefon söhbəti zamanı Dağlıq Qarabağ ətrafında yaranmış vəziyyət müzakirə olunub. Vəziyyətin bütövlükdə sabit olmasından, atəşkəs rejiminə dönmədən riayət edilməsindən məmnunluq ifadə edilib.

Rusiya Federasiyası Hökuməti sədrinin müavini Aleksey Overçukun Bakıda apardığı danışıqlar nəzərə alınmaqla, Cənubi Qafqazda iqtisadi əlaqələrin və nəqliyyat kommunikasiyalarının nizamlanması üzrə Rusiya, Azərbaycan prezidentlərinin və Ermənistan baş nazirinin 2020-ci il 10 noyabr və 2021-ci il 11 yanvar tarixli bəyanatlarına müvafiq olaraq aparılan işlərin gedişi nəzərdən keçirilib. Bu kontekstdə üç ölkənin Baş nazirləri müavinlərinin həmsədrliyi ilə işçi qrupunun fəaliyyəti müsbət qiymətləndirilib.

İkitərəfli gündəlikdəki bir sıra aktual məsələlərə, o cümlədən koronavirus pandemiyasına qarşı mübarizədə əməkdaşlıq məsələlərinə toxunulub. Hər iki tərəfin Azərbaycan-Rusiya strateji tərəfdaşlığının möhkəmləndirilməsini, qarşılıqlı faydalı layihələrin inkişafını davam etdirmək əzmi təsdiqlənib.

Əlaqələrin davam etdirilməsi barədə razılıq əldə edilib.

***

14:22

Azərbaycan və Rusiya prezidentləri İlham Əliyev və Vladimir Putin arasında telefon danışığı olub.

APA-nın Moskva müxbirinin Kremlin mətbuat xidmətinə istinadən verdiyi məlumata görə, Azərbaycan və Rusiya liderləri Dağlıq Qarabağ ətrafındakı vəziyyəti müzakirə ediblər.

Vəziyyətin ümumiyyətlə sabit olduğu və atəşkəsə ciddi şəkildə əməl edildiyi məmnuniyyətlə qeyd edilib.

“Rusiya Federasiyası Baş nazirinin müavini Aleksey Overçukun Bakıdakı danışıqları nəzərə alınaraq, Cənubi Qafqazda iqtisadi əlaqələrin və nəqliyyat kommunikasiyalarının yaradılması üzrə işlərin gedişatı nəzərdən keçirilib.

Rusiya, Azərbaycan və Ermənistan Baş nazir müavinlərindən ibarət işçi qrupun fəaliyyətinə müsbət qiymət verilib.

İkitərəfli gündəlikdə duran bir sıra aktual məsələlərə, o cümlədən koronavirus infeksiyasının yayılmasına qarşı mübarizədə əməkdaşlığa toxunulub.

Dövlət başçıları Rusiya-Azərbaycan strateji tərəfdaşlığının möhkəmləndirilməsini və qarşılıqlı faydalı layihələrin inkişafını davam etdirmək üçün niyyətlərini təsdiq ediblər, - deyə Kremlin məlumatında vurğulanıb.