Bahar Muradova BQXK-nin Azərbaycandakı nümayəndəliyi ilə görüş keçirib

Bahar Muradova BQXK-nin Azərbaycandakı nümayəndəliyi ilə görüş keçirib
  • Clock-gray 17:54
  • calendar-gray 23 Sentyabr 2020

Ailə, Qadın və Uşaq Problemləri üzrə Dövlət Komitəsinin (AQUPDK) sədri Bahar Muradovanın Beynəlxalq Qızıl Xaç Komitəsinin (BQXK) Azərbaycan Respublikasındakı Nümayəndəliyinin sabiq rəhbəri Elena Sessera və təşkilata təyin olunmuş yeni rəhbər Arian Bauer ilə görüşü keçirilib.

Komitədən APA-ya verilən məlumata görə, Bahar Muradova Ermənistan-Azərbaycan, Dağlıq Qarabağ münaqişəsinə toxunaraq, münaqişənin yaratdığı çətinliklərlə üzləşən insanlara, eyni zamanda təmas xəttinə yaxın ərazilərdə yaşayan uşaqlara Beynəlxalq Qızıl Xaç Komitəsi tərəfindən göstərilən dəstəyin xüsusi əhəmiyyət daşıdığını qeyd edib. O, müharibə nəticəsində əsir və ya girov götürülmüş insanların tapılması, geri qaytarılması, onların ailələri ilə müvafiq işlərin aparılması, zərər çəkmiş qadın və uşaqların hüquqlarının müdafiəsi istiqamətində görülən işlər haqqında məlumatları diqqətə çatdıraraq, bu prosesin davam etdirilməsinin vacibliyini bildirib.

B.Muradova ölkəmizə qaytarılan azərbaycanlı uşaqların cəmiyyətə inteqrasiya olunması, onların təhsil və səhiyyə xidmətlərinə çıxışının təmin edilməsi, uşaqların psixo-sosial vəziyyətinin qiymətləndirilməsi, psixoloji durumunun normallaşdırılması və müvafiq qurumlar tərəfindən əlaqələndirilmiş xidmətlərin göstərilməsinin mühüm əhəmiyyət kəsb etdiyini qeyd edib. O, sosioloqların iştirakı ilə bu qrupdan olan uşaqların ailələrinin ziyarət edilməsi, uşaqların təhlükəsizliyinin təmin edilməsi istiqamətində görülən işlərin bu gün də davam etdiyini deyib.

Komitə sədri həm ölkə daxilində, həm də ölkədən kənarda yaşayan hər bir Azərbaycan vətəndaşının həyatının hər şeydən önəmli olduğunu vurğulayaraq, dövlət tərəfindən atılan addımlarda humanizm və insan təhlükəsizliyinin balanslı bir şəkildə təmin olduğunu diqqətə çatdırıb. O qeyd edib ki, Prezident İlham Əliyev bunu ən müxtəlif beynəlxalq platformalarda açıq şəkildə bəyan edərək digər həmkarlarından da problemlərə uyğun yanaşma sərgiləməsini istəyir.

 B.Muradova Komitə əməkdaşlarının da bu işə fəal cəlb edilərək, öz səlahiyyətləri çərçivəsində uşaqların psixoloji və sosial xidmətlərlə təmin edilməsi, onların ehtiyaclarının öyrənilməsi istiqamətində fəaliyyətini qeyd edib. O, eyni zamanda pandemiyanın yaratdığı çətinliklərdən irəli gələrək hələ də ölkəmizə qayıtmasını gözləyən uşaqların olduğunu deyərək, bu istiqamətdə görən işlərin gücləndirilməsinin vacibliyini vurğulayıb.

E.Sessera Azərbaycanı xoş xatirələrlə tərk edəcəyini bildirərək, təşkilata yeni təyin olunmuş A.Bauerin bu missiyanın öhdəsindən layiqincə gələcəyinə və qurulmuş ikitərəfli münasibətlərin daha da möhkəmlənəcəyinə olan inamını ifadə edib. O, təşkilatın Azərbaycanda reallaşdırdığı layihələrdən söhbət açaraq, BQXK-nın Azərbaycanla bağlı ötən dövr ərzində genişmiqyaslı layihələrinin Dövlət Komitəsi ilə fəal əməkdaşlıq müstəvisində uğurla icra olunduğunu diqqətə çatdırıb və bu istiqamətdə ölkədə fəaliyyətlərinin səmərəli həyata keçirilməsində Dövlət Komitəsinin dəstəyini xüsusi qeyd edib. 

O, Azərbaycanın bu sahə üzrə həm təhlükəsizlik, həm də humanitar yanaşmanı tarazlaşdıran müsbət təcrübəsinin olduğunu vurğulayaraq, pozitiv ölkə nümunəsinin əks olunduğu müəllif yazısının nəşr ediləcəyini diqqətə çatdırıb.

BQXK-nın Azərbaycan Respublikasındakı Nümayəndəliyinə təyin olunmuş yeni rəhbər Arian Bauer ölkəmizin BQXK ilə əməkdaşlığının bundan sonra da müvəffəqiyyətlə davam etməsi üçün bütün səylərini artıracağını qeyd edib. 

Görüşdə həmçinin, BQXK ilə Azərbaycan Hökuməti arasında qarşılıqlı əlaqələr, təşkilatın mandatına uyğun fəaliyyəti ilə bağlı cari və perspektiv məsələlər, birgə keçirilən mühüm layihələr və onların icra mexanizmi, təşkilatın münaqişə zonalarında olan Azərbaycan vətəndaşları, xüsusən də  münaqişələrdən əziyyət çəkən uşaqlarla bağlı gördüyü vacib tədbirlər, Ermənistan-Azərbaycan, Dağlıq Qarabağ münaqişəsinə və humanitar əməkdaşlığa dair fikir mübadiləsi aparılıb.

Görüşdə Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova, aparat rəhbəri Ceyran Rəhmətullayeva və Komitə əməkdaşları, eyni zamanda BQXK-nın Azərbaycan Respublikasındakı Nümayəndəliyində fəaliyyət göstərən Ailə əlaqələrinin bərpa proqramı üzrə məsul şəxs Turanə Bağırova iştirak edib.

Günay Elşadqızı

Digər xəbərlər