Britaniya səfiri Quba Soyqırımı Memorial Kompleksini ziyarət edib

Britaniya səfiri Quba Soyqırımı Memorial Kompleksini ziyarət edib
  • Clock-gray 12:59
  • calendar-gray 24 Fevral 2020

Böyük Britaniyanın Azərbaycandakı səfiri Ceyms Şarp Qubaya səfər edib.

APA-nın şimal bürosunun məlumatına görə, səfir öncə Quba Rayon İcra Hakimiyyətinin başçısı Ziyəddin Əliyev tərəfindən qəbul edilib və ona rayon haqqında ətraflı məlumat verilib. 

Daha sonra səfir Quba Soyqırımı Memorial Kompleksini ziyarət edib. Qonaqlar erməni-bolşevik birləşmələrinin törətdikləri soyqırımı haqqında ətraflı məlumatlandırılıb.

Diqqətə çatdırılıb ki, Heydər Əliyev Fondunun dəstəyi ilə yaradılan Quba Soyqırımı Memorial Kompleksi 2013-cü il sentyabrın 18-də açılıb. Kompleksdə XX əsrin əvvəllərində Quba şəhərinin müxtəlif ərazilərinin görüntüləri, o zaman burada aparılan tikinti-quruculuq işləri, əhalinin həyat tərzi haqqında fotolar var. Burada quraşdırılmış monitordakı xüsusi xəritədə ermənilərin ötən əsrdə xalqımıza qarşı respublikanın müxtəlif bölgələrində həyata keçirdikləri soyqırımı aktları barədə bir neçə dildə məlumat əldə etmək mümkündür.

Bildirilib ki, Quba soyqırımı məzarlığı 2007-ci il aprelin 1-də ərazidə torpaq işləri görülərkən aşkarlanıb. Bundan sonra AMEA-nın Arxeologiya və Etnoqrafiya İnstitutunun əməkdaşları tərəfindən kütləvi məzarlıqda geniş tədqiqat işləri aparılıb. Tədqiqatlar nəticəsində məzarlığın 1918-ci ildə ermənilərin yerli dinc əhaliyə qarşı törətdikləri soyqırımı ilə bağlı olduğu müəyyən edilib.

Səfir bildirib ki, bu onun Qubaya ilk səfəridir. Onun sözlərinə görə, bu kimi səfərlər Azərbaycan haqqında daha dolğun məlumat almağa və ölkəni tanımağa kömək olur.

Ceyms Şarp həmçinin bir sıra istehsal müəssisələrində və dağ yəhudilərinin kompakt yaşadığı Qırmızı Qəsəbədə olub.

Vəli Turan

Digər xəbərlər

Arxiv

date