Şuşada bərpa edilən məscidlərin içində ola bilər ki, bəzisi muzey kimi fəaliyyət göstərsin.
Bunu APA-nın sualına cavab olaraq, Dini Qurumlarla İş üzrə Dövlət Komitəsi sədrinin birinci müavini Səyyad Salahlı deyib.
Sədr müavini qeyd edib ki, bu özü də Şuşaya ayrıca gözəllik qatacaq: "Əsasən, bu məscidlər aidiyyəti üzrə fəaliyyət göstərəcək. Lakin dediyim kimi, elə məscidlər ola bilər ki, muzey kimi istifadə edilsin. Bu isə özlüyündə Şuşanın simasına əlavə bir gözəllik qatacaq".
Səyyad Salahlı dağıdılmış məscidlərin hər birinin bərpa ediləcəyini deyib: "Biz çalışacağıq ki, Qarabağda və Şuşadakı bütün məscidləri bərpa edək. Məsələ burasındadır ki, ermənilər dünya ictimaiyyətinin qınağından qorxaraq Gövhər ağa məscidini, Ağdam məscidini və bu kimi bəzi məscidlərimizi dağıda bilmədilər, yer üzündən silə bilmədilər. Amma elə məscidlər də var ki, onları darmadağın ediblər. Təməlinə qədər söküblər, daşlarını aparıblar. Biz bu məscidləri də bərpa edəcəyik".
Azərbaycan Respublikası Dini Qurumlarla İş üzrə Dövlət Komitəsindən APA-ya bildirilib ki, sədrin birinci müavini Səyyad Salahlı açıqlamada mədəniyyət paytaxtımız Şuşada erməni vandalizmini, ermənilərin törətdikləri cinayətləri, xüsusilə tarixi-dini abidələrimizə qarşı etdikləri vəhşiliklərin faktlarla özündə əks etdirən muzeyin yaradılmasının mümkünlüyünü nəzərdə tutub.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
