MHM və "Azercell" arasında "SmartCell" proqram təminatının tətbiqinə dair əməkdaşlıq memorandumu imzalanıb - FOTO

MHM və "Azercell" arasında "SmartCell" proqram təminatının tətbiqinə dair əməkdaşlıq memorandumu imzalanıb - FOTO
  • Clock-gray 12:14
  • calendar-gray 04 Dekabr 2019

Azərbaycan Nəqliyyat, Rabitə və Yüksək Texnologiyalar Nazirliyinin Məlumat Hesablama Mərkəzi (MHM) hər il olduğu kimi bu dəfə də "Bakutel 2019" Beynəlxalq Telekommunikasiya və İnformasiya Texnologiyaları Sərgi-Konfransında məhsullarını təqdim edir.

Nazirlikdən “APA-Economics”ə verilən məlumata görə, sərgi çərçivəsində nümayiş olunan “SmartCell” həllinin tətbiqinə dair “Azercell” mobil rabitə operatoru ilə MHM arasında əməkdaşlıq memorandumu imzalanıb. Memoranduma əsasən, elektron imzadan istifadə etməklə mobil operatorla müştəri arasında bağlanılan elektron abunə müqaviləsinin tətbiqi, abunəçilərin üz təsviri üzrə eyniləşdirilməsi sahəsində əməkdaşlıq olunacaq.

Memorandumu MHM-nın direktoru Elnar Əsəsdov və “Azercell”in prezidenti Vahid Mürsəliyev imzalayıblar.

Qeyd edək ki, “SmartCell” – üz tanıma və elektron imza texnologiyalarını birləşdirən yeni mobil həldir. Eyni zamanda üz tanıma texnologiyası (face ID) ilə mobil nömrələrin satışını həyata keçirən rəqəmsal nömrə satışı sistemidir. Sistem, müştərinin iştirakı ilə real vaxt rejimində əldə edilmiş şəklin şəxsiyyət vəsiqəsindəki şəkil ilə eyniləşdirilməsinə, həmçinin abunə müqaviləsinin elektron  imza ilə imzalanmasına imkan verir.

“SmartCell” nömrə satış sistemi həm operatorlar, həm də müştərilər üçün vaxta qənaət, elektron müqavilə, elektron imza ilə əməliyyatın aparılması, satıcının və müştərinin şəkli (face ID) və elektron imza ilə identifikasiyası, yalnız səlahiyyətli şəxslər tərəfindən satışın təmini kimi üstünlüklər verir.

Nəqliyyat Rabitə və Yüksək Texnologiyalar Nazirliyinin Milli Sertifikat Xidmətləri mərkəzi tərəfindən nömrə satışı zamanı elektron imza sertifikatının təqdim edilməsi prosesi sadədir. Mobil tətbiqin köməyi ilə şəxsiyyət vəsiqəsi ilə üz tanınma prosesi həyata keçirilir. Həmin şəxsi məlumatlar əsasında e-imza yaratma və yoxlama məlumatları yaranır. Şəxsə aid imza yaratma məlumatları müvafiq proqramın içərisində təhlükəsiz şəkildə saxlanılır. Bu məlumatlar əsasında şəxsə aid sertifikat sorğusu hazırlanır. Sertifikat Xidmətləri Mərkəzinin müvafiq infrastrukturuna sertifikatın alınması üçün sorğu göndərilir. Mərkəz tərəfindən verilən sertifikat proqram tərəfindən qəbul olunaraq sənədləri imzalamaq üçün tam istifadəyə hazır vəziyyətə gətirilir. Bütün bu proses qısa vaxt ərzində baş verir.

Xatırladaq ki, üz tanıma və elektron imza texnologiyalarını birləşdirən “SmartCell” texnologiyası gələcəkdə bank və maliyyə sahələrində də tətbiq edilə biləcək. Bu texnologiyanın tətbiqi zamanı prosesin video-çəkilişini də təmin etmək mümkündür.

APA-Economics

Digər xəbərlər