Bu gün Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin rəisi Zakir Sultanov Azərbaycanda səfərdə olan Maltanın UNESCO üzrə Milli Komissiyasının sədri Raymond Bondini qəbul edib.
APA-nın məlumatına görə, Z. Sultanov Azərbaycanın mədəni irsi, tarixi abidələri haqqında məlumat verərək ölkədə mədəni irsin qorunması, bərpası və təbliği sahəsində görülən işlərdən danışıb.
O vurğulayıb ki, Azərbaycan bu istiqamətdə beynəlxalq təşkilatlarla, xüsusi ilə UNESCO ilə sıx əməkdaşlıq edir.
Z. Sultanov ölkədə bir sıra tarixi abidələrdə bərpa-konservasiya işlərinin həyat keçirildiyini diqqətə çatdıraraq qeyd edib ki, Azərbaycanın ən qədim tarixi abidələrindən biri olan Çıraqqalada bərpa-konservasiya işləri həyata keçirilir. O artıq bərpa layihəsi yekunlaşan Mərdəkan qalasında da yaxın vaxtlarda bərpa işlərinə başlanılacağını diqqətə çatdırıb.
R. Bondin səfər müddətində bir sıra muzeylərdə, tarixi məkanlarda olduğunu vurğulayıb. O bildirib ki, Çıraqqala abidəsi, Hövsan və Türkan kəndləri yaxınlığında yerləşən “Araba yolları” dünya mədəni irsi baxımından unikal abidələrdir. Onun sözlərinə görə, Çıraqqalanın unikallığı qalanın böyük bir müdafiə səddinin tərkib hissəsi olması və ətraf landşaftının insan təsirlərinə az qalmasıdır.
R. Bondin hər iki abidənin UNESCO-nun Dünya Mədəni İrsi Siyahısına salınmasının vacibliyini qeyd edib. “Araba yolları”nın Maltada da olduğunu qeyd edən qonaq bu abidələrin dünyaya tanıdılması məqsədi ilə qarşılıqlı əməkdaşlığın qurulmasının vacibliyini vurğulayıb.
Görüşdə bu istiqamətdə qarşılıqlı maraq doğuran məsələlər müzakirə olunub, əlaqələrin gələcək perspektivləri haqqında fikir mübadiləsi aparılıb.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
