2021-ci ilin dekabr ayında Azərbaycanda gündəlik neft (kondensatla birlikdə) hasilatı 717,6 min barel olub.
Energetika Nazirliyindən "APA-Economics"ə verilən məlumata görə, hasilatın 597,1 min barelini xam neft, 120,5 min barelini isə kondensat təşkil edib.
Qeyd edilib ki, "OPEC+" ölkələri nazirlərinin 22-ci iclasında qəbul edilmiş "Əməkdaşlıq Bəyannaməsi" çərçivəsində Azərbaycanın hasilatın azaldılması ilə bağlı öhdəliyinin dekabrda gündəlik 64 min barel təşkil edəcəyi, gündəlik xam neft hasilatını isə noyabr ayı ilə müqayisədə 7 min barel artırmaqla 654 min barel həcmində saxlaması nəzərdə tutulurdu.
Beləliklə, Azərbaycan "OPEC+" çərçivəsində dekabr ayında öhdəliyini təxminən 108,7% yerinə yetirib.
Nazirlərin 23-cü iclasında qəbul edilmiş razılaşma çərçivəsində isə Azərbaycanda gündəlik xam neft hasilatının 2022-ci ilin yanvarında daha 7 min barel artırılaraq 661 min barelə çatdırılması, ixtisarla bağlı öhdəliyin isə 57 min barel həcmində olması nəzərdə tutulur.