Xarici siyasət

Yeni Azərbaycan Partiyası (YAP) Sədrinin müavini – Mərkəzi Aparatın rəhbəri Tahir Budaqovun rəhbərlik etdiyi nümayəndə heyəti qardaş Türkiyə Respublikasına səfər edib.

YAP-dan APA-ya verilən verilən xəbərə görə, səfər çərçivəsində martın 13-də Ankarada YAP Sədrinin müavini – Mərkəzi Aparatın rəhbəri Tahir Budaqov ilə Türkiyənin hakim Ədalət və İnkişaf Partiyası (AK Parti) Sədrinin birinci müavini, İstanbul millət vəkili Numan Kurtulmuş arasında görüş keçirilib.

AK Parti Sədrinin birinci müavini, İstanbul millət vəkili Numan Kurtulmuş Azərbaycan ilə Türkiyə arasındakı dostluq, qardaşlıq və strateji müttəfiqlik münasibətlərinin önəmindən bəhs edib. Numan Kurtulmuş Azərbaycan ilə Türkiyənin istənilən şəraitdə və hər vəziyyətdə bir-birinin yanında olduqlarını qeyd edib. Türkiyədə baş vermiş zəlzələnin ilk dəqiqələrindən Prezident İlham Əliyevin Türkiyəyə dəstək ifadə etdiyini xatırladan Numan Kurtulmuş Azərbaycanın göstərdiyi maddi və mənəvi dəstəyin Türkiyə xalqı və dövləti tərəfindən yüksək qiymətləndirildiyini bildirib. AK Parti Sədrinin birinci müavini Prezident İlham Əliyevin qardaş dəstəyinə xüsusi ehtiyacın olduğu günlərdə Türkiyəyə səfər etməsinin böyük minnətdarlıqla qarşılandığını diqqətə çatdırıb. Numan Kurtulmuş zəlzələnin acı fəsadlarının aradan qaldırılması istiqamətində ardıcıl iş aparıldığını və Türkiyənin bu ağır sınaqdan da şərəflə çıxacağını vurğulayıb.

Qardaş ölkədə baş vermiş zəlzələ nəticəsində on minlərlə insanın həyatını itirməsi və xəsarət almasının Azərbaycan xalqı tərəfindən böyük üzüntü ilə qarşılandığını söyləyən YAP Sədrinin müavini – Mərkəzi Aparatın rəhbəri Tahir Budaqov fəlakətlə əlaqədar Türkiyə xalqına başsağlığı verib, yaralananlara isə Allahdan şəfa diləyib.

YAP Sədrinin müavini təbii fəlakətin baş verməsinin ardından dərhal Azərbaycanın qardaş ölkəyə dəstək göstərdiyini xatırladaraq acı faciənin fəsadlarının aradan qaldırılması üçün Azərbaycan Respublikasının Prezidenti İlham Əliyevin və Birinci vitse-prezident Mehriban xanım Əliyevanın müvafiq göstərişləri ilə təxirəsalınmaz tədbirlər həyata keçirildiyini diqqətə çatdırıb. O, Azərbaycan xalqının könüllü şəkildə müxtəlif təşəbbüslər irəli sürərək maddi və mənəvi dəstək göstərməsinin sarsılmaz birlik nümunəsi olduğunu vurğulayıb. Tahir Budaqov bütün Azərbaycan xalqı kimi, Yeni Azərbaycan Partiyasının üzvlərinin də zəlzələdən əziyyət çəkən qardaşlarımıza öz dəstəyini və köməyini əsirgəmədiklərini qeyd edib.

YAP Sədrinin müavini Türkiyənin qüdrətli dövlət kimi istənilən çətinliyin öhdəsindən gəlmək iqtidarında olduğunu bildirib. O, Prezident Rəcəb Tayyib Ərdoğanın rəhbərliyi ilə görülən işlər nəticəsində təbii fəlakətin nəticələrinin tezliklə aradan qaldırılacağına əminliyini ifadə edib, Azərbaycanın hər zaman sevincimizin və kədərimizin bir olduğu dost və qardaş Türkiyənin yanında olduğunu vurğulayıb. Qarşıdan gələn seçkilərin qardaş ölkənin gələcəyi üçün uğurlu olmasını arzu edən Tahir Budaqov “Türkiyə xalqı müdrikdir və inanıram ki, düzgün seçim edərək son illərdə qazanılan möhtəşəm uğurların davamına səs verəcək”,- deyə bildirib.

Görüşdə YAP ilə AK Parti arasındakı münasibətlərin hazırkı durumu və perspektivləri ilə əlaqədar də fikir mübadiləsi aparılıb. 2021-ci ildə iki partiya arasında imzalanmış Əməkdaşlıq Protokolundan irəli gələrək mühüm addımların atıldığı, qarşılıqlı səfərlərin əlaqələrin inkişafına əhəmiyyətli töhfə olduğu diqqətə çatdırılıb.

Tahir Budaqovun rəhbərlik etdiyi nümayəndə heyətinin qardaş Türkiyə Respublikasına səfəri çərçivəsində AK Parti Sədrinin xarici əlaqələr üzrə müavini, Bursa millət vəkili Efkan Ala ilə də görüş keçirilib. Efkan Ala istər Azərbaycan Prezidenti cənab İlham Əliyevin, istərsə də Yeni Azərbaycan Partiyasının nümayəndə heyətinin Türkiyəyə səfərinin zəlzələnin ağır fəsadlarını yaşayan Türkiyə xalqına böyük mənəvi dəstək kimi mühüm əhəmiyyətə malik olduğunu bildirib.

Türkiyə və Azərbaycan qədər bir-birinə mənəvi-siyasi cəhətdən yaxın ikinci ölkənin olmadığını söyləyən Efkan Ala “Qardaşlarımızın dəstəyi ilə bu sınaqdan da alnıaçıq çıxacaq, qarşıda duran bütün vəzifələri uğurla yerinə yetirəcəyik” deyib.

Görüşdə Yeni Azərbaycan Partiyası ilə AK Parti arasında iki il əvvəl imzalanmış Əməkdaşlıq Protokolu çərçivəsində görülən işlərin cari vəziyyətindən və qarşıda duran vəzifələrdən bəhs edilib, qarşılıqlı maraq doğuran bir sıra məsələlər müzakirə olunub.

Qeyd edək ki, YAP Sədrinin müavini-Mərkəzi Aparatın rəhbəri Tahir Budaqovun rəhbərlik etdiyi nümayəndə heyətində Milli Məclisin deputatı, Azərbaycan-Türkiyə dostluq qrupunun üzvü Ramil Həsən, YAP Mərkəzi Aparatının İnformasiya texnologiyaları və ictimaiyyətlə əlaqələr şöbəsinin müdiri Nurlan Qələndərov və Beynəlxalq əlaqələr və humanitar məsələlər şöbəsinin aparıcı məsləhətçisi Taleh Həsənzadə təmsil olunurlar.