Sosial

Ana səhifə

Sosial

Ali təhsil səviyyələrində məsafədən təhsilalma formasının tətbiqi genişləndirilir

29 oktyabr 2021 13:30 (UTC +04:00)

Məsafədən təhsilalma ali təhsil səviyyələrində təhsilalma formaları sırasına daxil edilir.
APA-nın məlumatına görə, bu, Elm və təhsil komitəsi yanında “Ali təhsil haqqında” qanun layihəsi üzrə yaradılmış işçi qrupunun tərəfindən hazırlanmış və işçi qrupun noyabrın 2-də keçiriləcək iclasında müzakirəyə çıxarılacaq “Ali təhsil haqqında” qanun layihəsində əksini tapıb.
Layihəyə əsasən, ali təhsil səviyyələrində təhsilalma formaları aşağıdakılardır:
- əyani (full-time (tədrisə tam cəlb olunma), part-time(tədrisə qismən cəlb olunma));
- qiyabi;
- məsafədən;
- eksternat.
Ali təhsilin səviyyələri üzrə təhsilalma formalarının tətbiqi aşağıdakı kimidir:
- qısamüddətli ali təhsil səviyyəsində - əyani, qiyabi, məsafədən;
- bakalavriat səviyyəsində - əyani, qiyabi, məsafədən və əsas (baza ali) tibb təhsili səviyyəsində - əyani;
- magistratura səviyyəsində - əyani, məsafədən və rezidenturada - əyani;
- doktorantura (adyunktura) səviyyəsində - əyani, qiyabi;
- əlavə ali təhsil - əyani, qiyabi, məsafədən.
Müvafiq icra hakimiyyəti orqanı tərəfindən müəyyən edilmiş qaydada digər təhsilalma formaları da tətbiq edilə bilər.
Qeyd edək ki, məsafədən təhsil tədris prosesinin elektron, telekommunikasiya, proqram-texniki vasitələr əsasında məsafədən təşkil edildiyi təhsilalma formasıdır.