Ümumdünya Səhiyyə Təşkilatı (ÜST) Azərbaycanın münaqişənin təsirinə məruz qalmış beş rayonunda "Sağlamlıq xəmsəsi" layihəsinin icrasını davam etdirir. APA-nın Qarabağ bürosunun xəbərinə görə, layihənin icrası Bərdə rayonundan sonra Ağdamda davam etdirilib. Bununla bağlı Ağdam Mərkəzi Rayon Xəstəxanasında təşkil olunan tədbirdə ÜST-nin Azərbaycan nümayəndəliyinin rəhbəri Hande Harmancı və Ağdam rayon İcra Hakimiyyətinin başçısı Vaqif Həsənov da iştirak edib.
V. Həsənov bildirib ki, beynəlxalq təşkilatların münaqişədən əziyyət çəkən rayonlarla bağlı həyata keçirdiyi layihələr, bu kimi səfərlər və göstərilən dəstək Azərbaycan dövlət başçısının apardığı siyasətin, danışıqların nəticəsidir: “Bu gün Ümumdünya Səhiyyə Təşkilatının Azərbaycan nümayəndəliyinin rəhbəri Hande Harmancı TƏBİB-in və Səhiyyə Nazirliyinin nümayəndələri ilə birlikdə Ağdama tibbi yardım gətirib. Ümumdünya Səhiyyə Təşkilatı son iki ildə bizim rayon əhalisi ilə sıx əlaqədə olan təşkilatdır. Bu qurum digər beynəlxalq təşkilatlara örnək olacaq təşkilatdır. Onlar Ağdamın ayrı-ayrı kəndlərdə tibbi yardıma ehtiyacı olan sakinlərə yardım göstərirlər. Bunlar hamısı Azərbaycan Respublikasının Prezidenti İlham Əliyevin beynəlxalq təşkilatlarla yaratdığı əlaqələrin nəticəsidir“.
ÜST-nin Azərbaycan nümayəndəliyinin rəhbəri Hande Harmancı isə bildirib ki, layihə çərçivəsində Bərdə, Ağdam rayonlarından sonra Tərtər və Füzuliyə tibbi yardım çatdıracaqlar. Göstərilən tibbi xidmət müharibə nəticəsində insanların sağlamlığına dəyən ziyanın aradan qaldırılması məqsədi güdür: “Müharibə insanların sağlamlığına ciddi ziyan vuran bir durumdur. Bizim qruplar 5 bölgənin kəndlərinə gedəcək. Bunlar ən ucqar kəndlərdir. Həkimlərimiz, psixoloqlarımız həmin kəndlərə ezam olunur. Biz istəyirik ki, bu layihə bir müddət davam etsin. Elə edək ki, mobil qruplara ehtiyac olmasın. Azərbaycanda İcbari Tibbi Sığorta üzrə Dövlət Agentliyi, TƏBİB kimi qurumlar yaradılıb. İnanırıq ki, Azərbaycanda çox güclü səhiyyə sistemi formalaşacaq. Biz də öz kiçik yardımlarımızla dəstək olacağıq“.
Qeyd edək ki, Füzuli, Ağcabədi, Ağdam, Bərdə və Tərtər regionlarını əhatə edən “Sağlamlıq xəmsəsi” layihəsinin məqsədi, təxminən 650.000 əhalisi olan bir bölgədə silahlı qarşıdurma və COVID 19-un təsirini səhiyyənin üzərində minimuma endirmək və psixo-sosial dəstək verməkdir. Layihə yerli işçi qüvvəsinin səhiyyə xidmətinin stabilləşdirilməsi səylərinin gücləndirilməsini hədəfləyir. Layihənin əsas məqsədləri ucqar bölgələrdə səhiyyə xidmətlərinə əlçatanlığın təkmilləşdirilməsi, 3 psixoloq və tibbi səyyar qrupları cəlb edərək psixi sağlamlıqla bağlı çətinlik yaşayan insanlara psixi sağlamlıq və psixo-sosial dəstək vermək, Ağdam, Bərdə, Tərtər, Ağcabədi və Füzulinin seçilmiş 25 məntəqəsində 5 tibbi səyyar komanda vasitəsi ilə zəruri səhiyyə xidmətləri göstərmək və ÜST-nin psixi sağlamlıq üzrə protokollarının və təlimatlarının tərcüməsini təşkil etməkdir.
Layihə çərçivəsində sözügedən 5 rayona 10 ədəd avtoklav, 10 ədəd oksigen konsentratoru, 480 qutu antigen testi, 38 adda avadanlıq və 101 adda dərman vasitəsi paylanacaq.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
