Bakı. Ramiz Mikayıloğlu-APA. Ədliyyə Nazirliyinin Kollegiyası “Vərəsəlik işlərinin açılıb-açılmaması barədə məlumatın verilməsi üzrə inzibati reqlament”i təsdiq edib.
APA-nın məlumatına görə, Ədliyyə Nazirliyi tərəfindən http://www.e-gov.az, http://exidmet.justice.gov.az elektron ünvanlarında fiziki və hüquqi şəxslərə təqdim edilən bu ödənişsiz elektron xidmət istifadəçilərə vərəsəlik işinin hansı notariat kontorunda açılması və ya vərəsəlik işinin ümumiyyətlə açılmaması ilə bağlı məlumatın elektron qaydada verilməsi qaydalarını müəyyən edir.
Elektron xidmətdən istifadə etmək üçün sənəd tələb olunmur. İstifadəçi elektron xidmətin təqdim edildiyi internet ünvanlarından birinə daxil olaraq açılmış ərizə formasının (əlavə olunur) müvafiq hissələrinə ölən şəxsin ad, soyad, ata adını və ölüm tarixi barədə məlumatları daxil edib “Axtar” düyməsini vuraraq sorğunu formalaşdırır. Sorğu informasiya sistemində yerləşdirildikdən dərhal sonra qeydiyyata alınır. İstifadəçi tərəfindən müvafiq məlumatlar tam daxil edilmədikdə sorğunun yerinə yetirilməsindən imtina edilir və imtinanın səbəbləri həmin internet səhifəsində dərhal əks olunur. Elektron xidmətin göstərilməsindən imtina istifadəçinin yenidən müraciət etməsinə mane olmur. Elektron xidmətin icrasına görə Azərbaycan Respublikası Ədliyyə Nazirliyinin Qeydiyyat və notariat baş idarəsi məsuliyyət daşıyır.
İstifadəçi müvafiq informasiya sisteminə ölən şəxsin ad, soyad, ata adını və ölüm tarixi barədə məlumatları daxil edərək “Axtar” düyməsini vurur. Axtarışın nəticəsində istifadəçiyə vərəsəlik işinin hansı notariat kontorunda açılması və ya ümumiyyətlə açılmaması barədə məlumat verilir. Axtarışın parametrlərinə uyğun olaraq prosesin müddəti məlumatların informasiya sistemində avtomatlaşdırılmış qaydada emalına sərf olunan vaxtdan asılıdır.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
