Sosial

Ana səhifə

Sosial

Heydər Əliyev Fondunun təşəbbüsü ilə Pakistandakı uşaq evlərinə bayram hədiyyələri paylanıb - FOTOSESSİYA

Heydər Əliyev Fondunun təşəbbüsü ilə Pakistandakı uşaq evlərinə bayram hədiyyələri paylanıb - <span style="color: red;">FOTOSESSİYA

21 sentyabr 2015 08:36 (UTC +04:00)

Bakı. Türbət Bağırova – APA. Heydər Əliyev Fondunun Prezidenti, UNESCO və İSESCO-nun xoşməramlı səfiri, Azərbaycanın birinci xanımı Mehriban Əliyevanın təşəbbüsü və dəstəyi ilə “Pakistan Sweet Homes” kimsəsizlər evinin İslamabad, Abbotabad və Kəraçidə yerləşən şöbələrində qurban bayramı münasibətilə silsilə tədbirlər keçirilib.

Azərbaycanın Pakistandakı səfirliyindən APA-ya verilən məlumata görə, tədbirlərdə “Pakistan Sweet Homes”un direktoru Zamurad Xan, Azərbaycan-Pakistan Gənclər Forumunun prezidenti, “Sülh və Diplomatik Tədqiqatlar İnstitutu” düşüncə quruluşunun direktoru Məhəmməd Asif Nur, tanınmış ictimai-siyasi xadimlər, senatorlar, media mənsubları, Azərbaycanın Pakistandakı səfirliyinin əməkdaşları və kimsəsizlər evində məskunlaşan uşaqlar iştirak ediblər.

Azərbaycan-Pakistan Gənclər Forumunun prezidenti M. Asif Nur çıxış edərək Azərbaycan-Pakistan dostluq və qardaşlıq münasibətlərinin tarixi və siyasi əhəmiyyətindən, hər iki ölkəni və xalqı birləşdirən siyasi və mənəvi amillərdən söz açıb.

“Pakistan Sweet Homes”un direktoru Zamrad Xan təşkilatın ölkənin müxtəlif yerlərindəki şöbələrində məskunlaşan 3600 yetim uşağı himayələrinə aldıqlarını söyləyərək bildirib ki, yetimlərə qayğı müqəddəs işdir, ilahi buyruqdur. O, Heydər Əliyev Fondunun xeyriyyəçilik layihələrinin ülvi dəyərlərin, yüksək mədəniyyətin təzahürü olduğunu, bu əməllərin hədər getmədiyini, Azərbaycan-Pakistan əlaqələrinə öz töhfəsini verdiyini qeyd edib.

Azərbaycanın Pakistandakı səfiri Daşqın Şikarov nitqində Azərbaycanın birinci xanımının adından iştirakçıları salamlayıb və Qurban bayramı ərəfəsində bir araya gəlməyin sevindirici olduğunu söyləyib. Səfir fondun Azərbaycanda, Pakistanda və digər xarici ölkələrdə reallaşdırdığı layihələr barədə iştirakçıları məlumatlandırıb. O, 24-25 sentyabr tarixlərində İslamabad, Abatabad və Karaçı şəhərlərində Azərbaycanın birinci xanımı Mehriban Əliyevanın dəstəyi ilə qurbanlıqların kəsilərək kimsəsizlər evinin 3600 sakininə və bölgələrdə məskunlaşan digər ehtiyacı olan insanlara paylanacağını bildirib.

Mərasimdə yetimlər evinin uşaqları Pakistan mədəniyyətinin elementlərini əks etdirən rəqslər, mahnılar ifa ediblər.

Tədbirin sonunda kimsəsizlər evində məskunlaşan uşaqlara Heydər Əliyev Fondu adından məktəbli çantaları, dərs ləvazimatları və digər hədiyyələr təqdim olunub.

Tədbir Pakistanın TV kanallarında nümayiş olunub, “Daily Times,” “The News”, “The Nation”, “Nawai Waqt”, “Pakistan Observer”, “Exspress”, “Diplomatic İnsight”, “Pakistan Today”, “Dna News” “The Frontier Post” və digər nüfuzlu qəzetlərdə müxtəlif məqalələr dərc edilib.