Tehran-Süleyman Fərzəliyev - APA. Bir neçə nəfər İran vətəndaşı İŞİD terror təşkilatına qoşulmaq üçün ölkəni tərk edib.
APA-nın "İRAN" qəzetinə istinadən verdiyi məlumata görə, bunu İran Parlamentinin Milli təhlükəsizlik və xarici siyasət komissiyasının təhlükəsizlik komitəsinin sədri Məhəmmədrza Möhsini Sani deyib. O bildirib ki, İŞİD-ə qoşulmaq üçün İran sərhədlərindən keçənlərin əksəriyyəti əcnəbidir. Komitə sədri İran ərazisindən istifadə edərək İŞİD-ə qoşulan iranlı və əcnəbilərin sayını açıqlamayıb.
Qeyd edək ki, son iki ildə bəzi İran vətəndaşlarının İŞİD-ə qoşulduğuna dair müxtəlif xəbərlər yayılır. Hələlik bu xəbərləri İslam Respublikasının rəsmiləri təsdiqləməyiblər.