Sosial

Ana səhifə

Sosial

İcbari tibbi sığorta haqqının məbləği qanunda dəyişiklik edildikdən sonra məlum olacaq

30 dekabr 2016 12:07 (UTC +04:00)

“İcbari tibbi sığorta haqqının məbləği və onun hansı şəkildə toplanacağı qanunvericilikdə müvafiq dəyişikliklər edildikdən sonra məlum olacaq”.

İcbari Tibbi Sığorta üzrə Dövlət Agentliyinin İcbari tibbi sığorta şöbəsinin müdiri Vüqar Qurbanov APA-ya bildirib ki, hələlik pilot layihə icra olunduğu ərazilərdə yaşayan əhali baza zərfinə daxil olan xidmətləri Mingəçevir şəhərində və Yevlax rayonundakı tibb müəssisələrində, həmçinin müqaviləli tibb müəssisələrində alacaqlar. Onun sözlərinə görə, sığorta ödənişi sığorta olunanın ala biləcəyi tibbi xidmətin dəyəridir: "Prezidentin fərmanına əsasən, icbari tibbi sığortanın baza zərfinə daxil olan tibbi xidmətlərin tarifləri müəyyən edilib. Fərmanda göstərilən tariflər tibb müəssisələri tərəfindən göstərilən xidmətlərin qarşılığında agentliyin həmin tibb müəssisələrinə ödəyəcəyi məbləğdir. Məsələn, ilkin səhiyyə xidmətində hər bir sığorta olunana görə agentlik tibb müəssisəsinə illik 18 AZN, aorta koronar şuntlama (açıq ürək əməliyyatı) üçün tibb təchizatçısına (klinikaya) ağırlıq dərəcəsinə görə 4720 – 6320 AZN arasında ödəniş olunacaq".

V.Qurbanov əlavə edib ki, prezident İlham Əliyevin “Mingəçevir şəhərinin və Yevlax rayonunun inzibati ərazilərində icbari tibbi sığortanın tətbiqinin təmin edilməsi sahəsində əlavə tədbirlər haqqında” fərmanına əsasən, 2017-ci ilin yanvar ayında pilot ərazilərdə icbari tibbi sığortanın tətbiqinə başlanılır. Onun sözlərinə görə, bu fərmanla Mingəçevir şəhərinin və Yevlax rayonunun inzibati ərazilərində icbari tibbi sığortanın baza zərfinə daxil olan tibbi xidmətlərin siyahısı və tarifləri də təsdiqlənib: "Həmin tariflər əsasında pilot ərazilərdə yaşayan əhaliyə xidmət göstəriləcək. Sığorta haqqı əhalinin İcbari Tibbi Sığorta üzrə Dövlət Agentliyinə ödəyəcəyi məbləğdir".

Qeyd edək ki, Mingəçevir şəhərinin və Yevlax rayonunun inzibati ərazilərində icbari tibbi sığortanın baza zərfinə daxil olan tibbi xidmətlərin və icbari tibbi sığortanın baza zərfi ilə əhatə olunmayan tibbi xidmətlərin siyahısı və tarifləri ilə www.its.gov.az saytında (icbari tibbi sığorta bölməsi) tanış olmaq mümkündür.