Bakı – APA. Azərbaycan prezidenti İlham Əliyev dekabrın 17-də Çin Xalq Respublikasının Siyasi Konsultativ Şurasının Ümumçin Komitəsinin sədr müavini Bay Liçenin başçılıq etdiyi nümayəndə heyətini qəbul edib. APA-nın məlumatına görə, Azərbaycanla Çinin dost dövlətlər olduğunu vurğulayan prezident İ. Əliyev ikitərəfli əməkdaşlığın müxtəlif sahələrdə uğurla inkişaf etdiyini bildirib, ölkələrin dostluq və tərəfdaşlıq əlaqələrini davam etdirmək əzmində olduğunu deyib.
Dövlət başçısı Çin şirkətlərinin Azərbaycana olan marağının önəmini qeyd edib. Enerji sektorunda əməkdaşlığın razılıq doğurduğunu vurğulayan prezident nəqliyyat sahəsində də əlaqələrin yaxşı perspektivlərə malik olduğunu deyib.
Öz növbəsində, Azərbaycanla Çin arasında dostluq əlaqələrinin uzun tarixə malik olduğunu vurğulayan B. Liçen bu səfərin Çin Xalq Respublikasının Siyasi Konsultativ Şurasının Ümumçin Komitəsi ilə Azərbaycan Respublikasının Milli Məclisi arasında əlaqələrin və xalqlar arasında dostluq münasibətlərinin daha da genişləndirilməsi baxımından əhəmiyyətini qeyd edib.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
