Bakı – APA. “Neftçi” may ayında keçirəcəyi iki ev oyununun stadionunu dəyişib. Klubdan apasport.az saytına verilən məlumata görə, “ağ-qaralar” AZAL və “İnter”lə paytaxt derbisini 8-ci km qəsəbə stadionunda keçirməyəcək.
Buna səbəb mayın 5-dən 21-dək Bakıda 17 yaşadək futbolçular arasında Avropa çempionatının keçiriləcəyidi. “Neftçi”nin ev oyunlarını keçirdiyi 8-ci km qəsəbə stadionunda 6 qrup oyunu və mayın 14-15-dəki 1/4 finallardan biri baş tutacaq. Vəli Qasımovun yetirmələri kubokun yarımfinalında “Qəbələ” ilk oyunu evdə keçirəcəyindən, mayın 4-də səfərdə oynaması stadion problemi yaratmayacaq.
Ancaq Topaz Premyer Liqasının XXXIII turunda AZAL (7 may) və XXXV turunda “İnter”lə (15 may) paytaxt derbiləri üçün “ağ-qaralar” məkan axtarmalı olublar. İsmət Qayıbov adına Bakıxanov qəsəbə stadionunda yenidənqurma işləri və baza tikintisi aparıldığından, bakılılar orda da oynaya bilməyəcəklər.
Bütün bunları nəzərə alan “Neftçi” rəhbərliyi AZAL-la “İnter”i Masazır qəsəbəsində yerləşən “Əlincə” stadionunda qəbul etmək qərarına gəlib. “Əlincə” Futbol Klubuna məxsus olan stadion AFFA-nın bayrağı altında keçirilən çempionatlarda iştirak üçün lisenziya aldığından, orda Premyer Liqa matçının keçirilməsinə bir mane yoxdu.
Qeyd edək ki, təbii örtüklü olan “Əlincə” stadionu 13 min azarkeş tutumuna malikdi.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
