Bakı - APA-Economics. Azərbaycan Dövlət Neft Şirkətinin (ARDNŞ) prezidenti Rövnəq Abdullayev Azot gübrəsi - Karbamid istehsalı zavodunda aparılan tikinti işlərinin vəziyyəti ilə tanış olub.
ARDNŞ-dən “APA-Economics”ə verilən məlumata görə, zavodunun layihəsi “2008-2015-ci illərdə Azərbaycanda əhalinin ərzaq məhsulları ilə etibarlı təminatına dair Dövlət Proqramı”na uyğun olaraq, 13 mart 2013-cü il tarixində ARDNŞ və Cənubi Koreyanın Samsung Engineering Co., Ltd. şirkəti arasında imzalanmış Mühəndislik, Satınalma və Tikinti üzrə Müqaviləyə əsasən həyata keçirilməkdədir.
İlkin olaraq zavod üçün ayrılmış sahənin tikintiyə hazırlanması işləri tamamlanmış və ərazidə geoloji tədqiqat işləri həyata keçirilib. Zavodun tikintisi layihəsinin uğurla davam etdirilməsi üçün layihənin idarə edilməsi və müstəqil təftiş işlərinin həyata keçirilməsi üzrə məsləhətçi şirkətin seçilməsi məqsədilə 28 mart 2014-cü il tarixində elan edilmiş beynəlxalq açıq tender üzrə təkliflərin qəbulu başa çatmış və tenderdə müvafiq sahə üzrə böyük nüfuza malik 3 beynəlxalq şirkət öz təkliflərini təqdim edib. Tender təkliflərinin qiymətləndirilməsi prosesinin cari ilin sentyabr ayında tamamlanması nəzərdə tutulur.
Zavodun tikintisinin 2016-cı ildə başa çatdırılması planlaşdırılır.
Gündəlik istehsal gücü 1200 ton ammonyak, 2000 ton dənəvər karbamid təşkil edəcək müəssisənin inşası zamanı 2500-3000 nəfər mövsümi işlə, müəssisə fəaliyyətə başladıqdan sonra isə 350-400 nəfər mütəxəssis daimi işlə təmin olunacaqdır.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
