Sahibkarlıq

Ana səhifə

Sahibkarlıq

Azərbaycanda əcnəbilərə məxsus əmlak 14% artıb

06 iyul 2012 08:20 (UTC +04:00)

Bakı. Əli Əhmədov - APA-Economics. Xarici ölkə vətəndaşlarının Azərbaycanda aldıqları əmlakın sayı artmaqdadır.

Əmlak Məsələləri Dövlət Komitəsindən (ƏMDK) «APA-Economics»ə verilən məlumata görə, 2011-ci ilin sonuna xarici vətəndaşlar Azərbaycanda 1265 daşınmaz əmlaka sahib olub ki, bu da bir il əvvələ - 2010-cu ilin nəticələrinə nisbətən 155 əmlak və ya 14% artıqdır.

Xaricilərə məxsus əmlakın böyük hissəsini - 942-ni mənzillər təşkil edir. Bundan başqa, xaricilər 191 fərdi evə və 2 bağ evinə malikdir. Əcnəbi vətəndaşlar ölkəmizdə qeyri-yaşayış obyektlərinin də sahibidir. Belə ki, hazırda 74 torpaq sahəsi, 45 qeyri-yaşayış sahəsi, 10 qeyri-yaşayış binası və 1 əmlak kompleksi xaricilərə məxsusdur.

Bir il əvvəllə müqayisədə xaricilərə məxsus mənzillərin, fərdi yaşayış evlərinin, torpaq sahələrinin, qeyri-yaşayış sahələrinin və qeyri-yaşayış binalarının sayı artıb. Bağ evləri və əmlak komplekslərinin sayı isə cüzi də olsa, azalıb. Belə ki, xaricilərin sahib olduğu mənzillərin sayı 833-dən 942-yə, fərdi evlər 183-dən 191-ə, torpaq sahələri 55-dən 74-ə, qeyri-yaşayış sahələrinin sayı 27-dən 45-ə, qeyri-yaşayış binalarının sayı 5-dən 10-a qalxıb.

Xaricilər təkcə Bakıda yox, ölkənin bütün ərazisində əmlak əldə edirlər. Amma xaricilərin sahib olduğu əmlakın əsas hissəsi hələ də Bakıdadır. ƏMDK-nin məlumatlarına əsasən, əcnəbilərin aldığı əmlakların 900-ü və ya ümumi əmlak sayının 71%-i paytaxtdadır. Bundan 800-ü mənzil, 49-u fərdi yaşayış evi, 44-ü qeyri-yaşayış sahəsidir.

Bakıdan sonra xaricilərin əmlak aldığı ən populyar ərazi Quba-Xaçmaz zonasıdır. Bu regionda xaricilər 72 əmlaka sahibdir. Bunların 8-i mənzil, 44-ü fərdi yaşayış evi, 19-u torpaq sahəsidir. Xaricilərin daşınmaz əmlak almaq üçün ən çox maraq göstərdiyi digər regionlar Sumqayıt (53), Şəmkir və Zaqatala (hər biri 42), Gəncə (39) və Yevlax ərazi idarəsinin əhatə etdiyi ərazilərdir (30 əmlak). Belə ki, xaricilər ölkənin bölgələrində Sumqayıtda 48, Gəncədə 34, Yevlaxda 25 mənzilə sahibdir. Fərdi evlərin sayına görə Bakı və Xaçmazdan sonrakı yerləri Zaqatala (24 fərdi ev), Şəmkir (17), Qəbələ (12) və Bərdə (11 fərdi ev) rayonları tutur. Xaricilər torpaq sahələrini ən çox Şəmkirdə (24) və Xaçmazda (19) əldə ediblər.

Ümumilikdə xaricilərin əmlak sahibi olduğu ərazi idarələrinin 9-unda əmlakların sayının artımı, 7-sində azalma müşahidə edilib.

Cədvəl 1. 2010-2011-ci illərdə xarici vətəndaşlar tərəfindən
(hazırda hüquq sahibi olan) qeydiyyata alınmış əmlakların sayı

Əmlak növü	2010	2011
Mənzil	833	942
Fərdi yaşayış evi	183	191
Torpaq	55	74
Qeyri-yaşayış sahəsi	27	45
Qeyri-yaşayış binası	5	10
Bağ evi	5	2
Əmlak kompleksləri	2	1
Ümumi	1110	1265

Mənbə: Əmlak Məsələləri Dövlət Komitəsi

Cədvəl 2. 2010-2011-ci illərdə xarici vətəndaşlar tərəfindən
qeydiyyata alınmış əmlakların ərazi idarələri üzrə sayı

Ərazilər	2010	2011
Bakı Şəhər Ərazi İdarəsi	765	900
Abşeron Ərazi İdarəsi	3	10
Bərdə Ərazi İdarəsi	8	15
Beyləqan Ərazi İdarəsi	3	12
Cəlilabad Ərazi İdarəsi	30	7
Gəncə Ərazi İdarəsi	51	39
Lənkəran Ərazi İdarəsi	0	0
Qəbələ Ərazi İdarəsi	11	15
Şamaxı Ərazi İdarəsi	4	5
Şəki Ərazi İdarəsi	1	1
Şəmkir Ərazi İdarəsi	14	42
Şirvan Ərazi İdarəsi	14	6
Sumqayıt Ərazi İdarəsi	68	53
Tovuz Ərazi İdarəsi	19	6
Ucar Ərazi İdarəsi	13	10
Xaçmaz Ərazi İdarəsi	54	72
Yevlax Ərazi İdarəsi	32	30
Zaqatala Ərazi İdarəsi	20	42
Ümumi	1110	1265