Turizm

Ana səhifə

Turizm

Macarıstanın turizm şirkətlərinin nümayəndələri Azərbaycana gəlir

05 oktyabr 2012 11:14 (UTC +04:00)

Bakı - APA-Economics. Macarıstan Azərbaycanla turizm əlaqələrini genişləndirmək niyyətindədir.

Azərbaycanın Macarıstandakı səfirliyindən “APA-Economics”ə verilən xəbərə görə, bu sahədə imkanları araşdırmaq, respublikamızın turizm obyektləri ilə tanış olmaq və qarşılıqlı fikir mübadiləsi aparmaq məqsədilə Macarıstanın aparıcı turist şirkətlərinin nümayəndələrindən, habelə turizm mövzusunda yazan jurnalistlərdən ibarət 15 nəfərlik qrup oktyabrın 6-dan 10-na qədər Azərbaycanda olacaq.

Yola düşməmişdən əvvəl Budapeştdəki Azərbaycan səfirliyinə gələn jurnalistlər və turist şirkətlərinin rəhbərləri bu səfərin onlar üçün yalnız ölkəmizin turizm imkanlarını araşdırmaq deyil, həm də Azərbaycan həqiqətlərini öyrənmək və yaymaq baxımından əhəmiyyətli olacağını bildiriblər. Səfər müddətində macar qonaqlar Azərbaycan Mədəniyyət və Turizm Nazirliyində, habelə bir sıra turist şirkətlərində görüşlər keçirəcək, Bakının görməli yerlərini və turist obyektlərini gəzəcəklər.
Onlar həm də Quba rayonundakı Xınalıq kəndinə və Qırmızı qəsəbəyə, İsmayıllı rayonundakı Lahıc kəndinə səfər edəcəklər. Turizm mövzusu gələn həftə Budapeştdə keçiriləcək Azərbaycan-Macarıstan Hökumətlərarası Komissiyasının 3-cü iclasında və hər iki ölkənin iş adamlarının qatıldıqları biznes forumda da diqqət mərkəzində olacaq.