Avropa

Ana səhifə

Avropa

İranla “altılıq” ölkələri arasında görüş mart ayında olacaq

29 fevral 2012 23:34 (UTC +04:00)

Bakı. Könül Cəfərli – APA. BMT Təhlükəsizlik Şurasının 5 daimi üzvü və Almaniyadan ibarət 5+1 qrupu (“altılıq”) İranla mübahisəli nüvə proqramı ilə bağlı görüşmək üçün ilkin razılıq əldə edib. Görüşün isə böyük ehtimalla mart ayında İstanbulda reallaşacağı bildirilib. APA-nın məlumatına görə, bu barədə Böyük Britaniyanın “The Guardian” qəzeti yazıb.
Avropa Birliyinin xarici siyasət və təhlükəsizlik məsələləri üzrə ali nümayəndəsi Ketrin Eşton da “altılıq”la İran arasında müzakirələrin yaxında başlayacağını açıqlayıb: “Mən tərəflər arasında müzakirələrin yaxında başlaması məsələsində optimistəm. İran müzakirəyə hazır olduğunu bildirib. İranın Ali Milli Təhlükəsizlik Şurasının katibi Səid Cəlili bununla bağlı fevralın 14-də məktub da yazıb”.
Bu arada Türkiyənin xarici işlər naziri Əhməd Davudoğlu isə TRT-yə açıqlamasında İranla Qərb ölkələri arasındakı müzakirələrin ən gec aprel ayında başlayacağına inandığını deyib: “Bu günlərdə tərəflər bir-birinə qarşılıqlı məktublar yazıb. İnşallah, gələcək həftə təkrar İran xarici işlər naziri ilə görüşəcəyəm. İnşallah yaxın vaxtlarda bir tarix müəyyənləşdirilər. Mart ayı İranda Novruz bayramıdır. Ona görə də mən ən gec aprel ayında təkrar görüşün olacağını düşünürəm. Əgər Türkiyəni seçsələr, biz hər vaxt ev sahibliyi edərik, əlimizdən gələn köməyi də təmin edərik”.