Daxili siyasət

Ana səhifə

Daxili siyasət

Tənzilə Rüstəmxanlı: “Türkiyədə həbs olunanların cinayət törətdiyinə inanmıram”

31 iyul 2008 12:59 (UTC +04:00)

- Türkiyədə gizli təşkilat olduğu iddia edilən “Ergenekon”la bağlı prokurorların hazırladığı ittihamnamədə sizin və Sabir Rüstəmxanlının da adı keçir. Bu barədə nə deyə bilərsiniz?
- İttihamnamədə adımızın olması ilə bağlı Azərbaycan və Türkiyə mətbuatında xeyli vaxtdır yazılar gedir. Biz neçə müddət idi Kıbrısda idik, sonra Türkiyəyə gəldik. Orada dostlarımızla görüşdük, Türk Dünyası Araşdırmalar Vəqfinin konfransında iştirak etdik. Ona görə də mətbuatda yazılanlara cavab vermək imkanımız olmayıb. Həbs olunanlardan Sevgi Erenerolun ifadəsində Tənzilə Rüstəmxanlının adı keçib. Burda qeyri-adi nə var ki? Tənzilə Rüstəmxanlı Azəri-Türk Qadınlar Birliyinin başqanıdır. Sevgi Erenerol da uzun müddət tanıdığım adamdır və bizim cəmiyyətin Türkiyə təmsilçisi olub. Onunla 1993-cü ildən bəri tanışlığım var və ailəvi dostluğumuz yaranıb. Təbii ki, dəfələrlə telefon əlaqəsi saxlamışıq. Mən ittihamnaməni bütünlüklə oxumuşam. Sevgi Erenerola sual verirlər ki, Azərbaycana niyə getmişdiniz? Sevgi xanım cavab verir ki, Azərbaycanda keçirilən konfranslarda, Tənzilə Rüstəmxanlının Xocalı soyqrımı ilə bağlı təşkil etdiyi tədbirdə iştirak edib. Sevgi Erenerol Tənzilə Rüstəmxanlını tanıyana qədər də Azərbaycana gəlib, tanıyandan sonra da. Onda gərək Türkiyədən bura axın edənlərin hamısının adı ittihamnaməyə yazılsın. Mənim adım orada bu şəkildə hallanıb. Keçirdiyimiz tədbirlərlə bağlı Sevgi xanıma zəng etmişəm, onun telefonu dinlənilib və danışıqlarımız qeyd edilib. Həbs edilən digər tanınmış şəxslər – vəkil Kamal Kerinçsiz və DAK-ın Türkiyə təmsilçisi, general Vəli Kiçiklə də söhbətlərimiz olub. Yəni məsələ bundan ibarətdir. Bununla bağlı hələ bizdən heç nə soruşmayıblar, bizi heç nədə günahlandırmayıblar. Amma bəzi qəzetlər elə təqdim edirlər ki, guya biz cinayət törətmişik.
- İttihamnamədə Azərbaycandan başqa kimlərin adı var?
- Mən ad çəkmək istəmirəm. Vəli Kiçik kiminlə danışıbsa, kimə salam veribsə, hamısının adı var. Yəni o qədər mənasız, boş şeylər var ki... Amma onu da deyim ki, illərlə Vəli Kiçiklə dostluq edənlər, onun imkanlarından yararlananlar, onun maliyyə yardımı ayırdığı qəzetlər səslərini çıxarmadılar.
- İstintaqa dəvət ediləcəyinizi gözləyirsinizmi?
- Məni nəyə görə istintaqa cəlb etməlidirlər ki?! Həbslərin getdiyi vaxt mən Türkiyədə idim və konfranslar keçirirdim. Elə indi də Türkiyədən gəlirəm, günahım olsaydı, hava limanında saxlayıb ya ifadə alardılar, ya da həbs edərdilər. Mən Türkiyədə həbs edilənlərin də cinayətkar olduğuna inanmıram.
- Həbs edilənlərin müdafiəsi üçün hansısa addımlar atacaqsınızmı?
- İlk gündən Sabir bəylə birgə onları müdafiə etməyə başlamışıq. Lazım gəlsə, yenə də müdafiə edəcəyik. Ən azından bu adamlar – Sevgi Erenerol, Kamal Kerinçsiz bizim ailə dostlarımızdır. Onların təmizliyinə inanırıq. Vəli Kiçik paşa haqqında deyilənlərdən xəbərimiz yoxdur, biz onu Azərbaycanın adı gələndə gözləri yaşla dolan adam kimi tanımışıq. Sevgi xanıma qarşı irəli sürülən ittihamların həqiqətlə əlaqəsinin olmadığına qəti inanıram. Bunlar məhkəmədə üzə çıxacaq.