Daxili siyasət

Ana səhifə

Daxili siyasət

ASDP Siyasi Bürosunun üzvü Elşən Manafov: “Araz Əlizadə siyasətdən getməlidir”

20 avqust 2008 10:48 (UTC +04:00)

Bu sözləri APA-ya açıqlamasında Azərbaycan Sosial Demokrat Partiyasının (ASDP) Siyasi Bürosunun üzvü, partiyanın ideoloji katibi Elşən Manafov deyib. E. Manafov bildirib ki, ASDP-də islahatlara yönələn addımlar atılmasa, partiyanın rəhbərliyinə yeni şəxslər və simalar gəlməsə, ölkədə sol siyasi xətti dolduracaq, hakimiyyətlə konstruktiv əməkdaşlığa meylli demokratik sol partiyanın yaradılması zərurəti yaranacaq: “Azərbaycanda sosial demokratiyanın problemi Araz Əlizadə ilə bağlı olub. Araz Əlizadə Azərbaycanda sosial ideologiyanın məhv olması üçün nəyi bacarıbsa, onu da edib. Bu tipli siyasətçilərin siyasi səhnədən getməsinə böyük ehtiyac var. Partiyanın son parlament seçkilərində göstərdiyi nəticələr onu göstərir ki, ASDP-də ciddi yeniləşmə olmalı, partiyanın rəhbərliyinə ölkənin reallıqlarını başa düşən şəxslər gəlməlidir. Partiyanın rəhbərliyinə hazırda siyasi baxımdan savadsız adamların toplaşdığı şəraitdə isə islahatlar aparmaq mümkün deyil”.

E. Manafov ASDP-də onu anlayanların bu islahatların aparılmasına dəstək verəcəklərini vurğulayıb: “Belə olmasa, tərəfdarlarımla partiyanın sıralarını tərk edəcək, Azərbaycan Demokratik Sol Partiyası yaratmağa başlayacağam”. ASDP Mərkəzi Komitəsinin plenumuna sənədlərin müzakirə üçün deyil, təsdiq üçün verildiyini söyləyən ideoloji katib plenumların nəzərdə tutulduğu kimi, 3 ayda bir dəfə deyil, iki ildə 3-4 dəfə keçirildiyini diqqətə çatdırıb: “Elə vəziyyət yaranıb ki, partiyanın plenumunun yığıncaqlarına Mərkəzi Komitənin 29 üzvündən 10-u qatılır”.

O bu məsələləri ASDP-nin həmsədri Ayaz Mütəllibovla da müzakirə etdiyini deyib: “Avqustun 18-də Ayaz Mütəllibovla danışdım, partiyanın sonuncu plenumunun qərarının onunla razılaşdırılıb-razılaşdırılmadığını öyrəndim. Məlum oldu ki, Ayaz Mütəllibovun plenumun qərarından xəbəri yoxdur. Ümumiyyətlə, Ayaz Mütəllibov partiyadakı proseslərdən narazıdır. Araz Əlizadənin atdığı bu addımlar partiyanın imicinə xələl gətirir”.
E. Manafov partiyanın seçkiyə qatılması məsələsində də A. Əlizadə ilə aralarında fikir ayrılığının yarandığını qeyd edib: “Ən məhdud imkanlarla belə, ASDP seçkiyə qatıla bilərdi. Mən seçkiyə getməyin tərəfdarı olmuşam”.

ASDP həmsədri Araz Əlizadə isə ittihamları əsassız sayır: “Heç kimin ağzını yuma bilmərəm. Elşən Manafov ağıllı, savadlı oğlandır. Bu ittihamları isə o, plenumda deməyib. Fikirlərini plenumda səsvermədən sonra söyləyib”. A. Əlizadə E. Manafovun tutduğu vəzifələrdən və partiyadan isə hələ çıxarılmadığını qeyd edib: “Vəzifədən və partiyadan çıxmaq üçün ərizə yazırlar. Əvvəl partiyadan çıxsın, sonra ayrı partiya yaratsın”.

ASDP