Daxili siyasət

Ana səhifə

Daxili siyasət

Azərbaycanın Dövlət Komissiyası: Qrant Qabrielyan qondarma qurumun rəsmilərinə deyil, BQXK-nin nümayəndəliyinə təhvil verilib

20 avqust 2008 11:12 (UTC +04:00)

Bakı. Məhbubə Qasımbəyli - APA. “Bu il mayın 16-da Azərbaycan hərbçilərinin mövqelərinə yaxın ərazidə saxlanılan, avqustun 19-da qarşı tərəfə təhvil verilən Qabrielyan Qrant Samveloviç adlı şəxslə bağlı qondarma “Dağlıq Qarabağ Respublikasının” “Dövlət Komissiyası” adından müxtəlif mətbuat orqanlarına ötürülən məlumatlar həqiqəti əks etdirmir, xəstə təxəyyüllün məhsulundan başqa bir şey deyil”.
APA-nın xəbərinə görə, bu barədə Azərbaycan Respublikasının Əsir və itkin düşmüş, girov götürülmüş vətəndaşlarla əlaqədar Dövlət Komissiyasının İşçi Qrupunun yaydığı məlumatda bildirilib.

Məlumatda göstərilib ki, Qrant Qabrielyan saxlanıldıqdan sonra onun şəxsiyyətini və yaşayış yerini müəyyən etmək üçün keçirilən söhbətlər zamanı səhhəti ilə bağlı bir sıra problemlərin olduğu müəyyənləşib: “İlk günlər o, özünü qeyri-adekvat aparıb, sualları cavablandırmağa və kimliyini izah etməyə, yaşadığı və işlədiyi yer barədə məlumat verməyə çətinlik çəkib. Bütün bu müddət ərzində onunla heç kim maraqlanmayıb və ya qondarma qurumun nümayəndələrinin dediyi kimi bu barədə Azərbaycan Respublikası Əsir və itkin düşmüş, girov götürülmüş vətəndaşlarla əlaqədar Dövlət Komissiyasına müraciət edilməyib. Nədənsə vətəndaş qaytarıldıqdan sonra bu qondarma qurum canlanıb, yadına düşüb ki, guya bu problemlərlə məşğul olur. Əgər onları Qrant Qabrielyanın taleyi maraqlandırırdısa, onda heç olmasa, beynəlxalq təşkilatlara müraciət edərdilər. Belə hal isə olmayıb”.

Dövlət Komissiyasının İşçi Qrupu bildirib ki, Qrant Qabrielyanın yaxınlarına qaytarılma prosesində müqabil tərəfdən yalnız BQXK-nin Xankəndindəki nümayəndəliyinin əməkdaşları iştirak ediblər: “Odur ki, Qabrielyan qondarma qurumun rəsmilərinə deyil, BQXK-nin nümayəndəliyinə təhvil verilib. Deportasiya prosesində yalnız BQXK-nin nümayəndələrinin iştirak etməsi isə çoxillik təcrübədə ilk dəfə baş verirdi”.

erməni_əsir