Daxili siyasət

Ana səhifə

Daxili siyasət

Azərbaycan prezidenti İlham Əliyev Xızı rayonuna səfər edib

22 avqust 2008 11:46 (UTC +04:00)

Abidənin önünə gül dəstəsi qoyan dövlət başçısı Heydər Əliyevin adını daşıyan parkda aparılan abadlıq-quruculuq işləri ilə tanış olub. Dövlət başçısına 3,2 hektar ərazini əhatə edən parkda sakinlərin istirahəti üçün lazımi şərait yaradıldığı barədə məlumat verilib.
Daha sonra dövlət başçısı Xızı şəhərində Heydər Əliyev muzeyinin təntənəli açılış mərasimində iştirak edib. Rəmzi açılışı bildirən lenti kəsən prezident muzeylə tanış olub. Qeyd edək ki, muzeyin ekspozisiya salonunda Heydər Əliyevin həyat və fəaliyyəti ilə bağlı fotoşəkillər toplanıb. Binada kompüter, iş otaqları, konfrans salonu da var.
Azərbaycan prezidenti həmçinin şəhər ictimaiyyətinin nümayəndələri ilə də görüşüb. Prezident İlham Əliyev son illər Xızı rayonunda görülən işləri yüksək qiymətləndirib və gözəl təbiətə malik olan bölgədə turizmin və kənd təsərrüfatının inkişaf etdirilməsi üçün xüsusi proqramların hazırlandığını bildirib. O qeyd edib ki, Xızı rayonunun problemlərinin həlli üçün əlavə vəsait də ayrılacaq.
Dövlət başçısı Xızıya səfəri çərçivəsində şəhərdə fəaliyyət göstərən Şahmat Mərkəzinin fəaliyyəti ilə də yaxından tanış olub. Mərkəzin direktoru Esmira Kərimova dövlətimizin başçısına məlumat verib ki, qısa müddətdə tikilib istifadəyə verilmiş mərkəzdə uşaqların bu qədim oyunun sirlərini öyrənməsi üçün şərait var. Gələcəkdə mərkəzin genişləndirilməsi nəzərdə tutulur.
Bu gün həmçinin Xızı rayonunda Qarabağ müharibəsi əlilləri və şəhid ailələri üçün inşa edilmiş ikimərtəbəli 16 mənzilli bina istifadəyə verilib. Mərasimə qatılan president İlham Əliyev mənzillərin orderlərini sahiblərinə təqdim edərək, onları təbrik edib. Ölkəmizdə əlillərə və şəhid ailələrinə göstərilən diqqət və qayğıdan danışan dövlət başçısı bildirib ki, Azərbaycan inkişaf edir: “Azərbaycan daha da güclənir, ordu quruculuğu sahəsində mühüm işlər görülür: “Biz işğal olunmuş torpaqlarımızı azad edəcəyik”. Bununla da prezidentin Xızı rayonuna səfəri başa çatıb.