Daxili siyasət

Ana səhifə

Daxili siyasət

Azərbaycanın milli təhlükəsizlik naziri Eldar Mahmudov Rusiyalı həmkarları ilə görüşüb

04 aprel 2009 16:50 (UTC +04:00)

MTN İctimai Əlaqələr Mərkəzindən APA-ya verilən məlumata görə, görüşdə nazir Eldar Mahmudov Milli Təhlükəsizlik Nazirliyində yeni yaradılmış strukturlar, ümumən həyata keçirilən islahatlar və onların səmərəli nəticələri, terrorçuluğa, narkotiklərin qanunsuz dövriyyəsi, qanunsuz miqrasiya, mütəşəkkil cinayətkarlığın müxtəlif təzahürlərinə qarşı aparılan mübarizə üzrə görülmüş işlər, habelə mövcud əməliyyat şəraiti və ona təsir göstərən amillər haqqında məlumat verib. Azərbaycanın silahlı separatçılıq, ekstremizm təzahürlərinin, Ermənistanın hərbi təcavüzünün çətinlikləri ilə üzləşdiyini bildirən Eldar Mahmudov, eyni zamanda daha bir qlobal təhlükə olan beynəlxalq terrorçuluq təhdidlərinin qarşısının alınması üzrə həyata keçirilmiş tədbirlərdən danışıb, qarşılıqlı faydalı əməkdaşlığın daha da genişləndirilməsi zərurətini önə çəkib.

Aleksandr Bortnikov 90 illik yubiley münasibətilə bir daha təbriklərini çatdırıb, göstərilən qonaqpərvərliyə, geniş və dolğun məlumata görə təşəkkürünü bildirib. Qonaq Azərbaycana ilk səfərindən xoş təəssüratlar aldığını, Rusiya və Azərbaycan arasında çoxəsrlik tarixi-mədəni və dostluq əlaqələrinin olduğunu vurğulayıb, hər iki xalqın mənafelərinin və təhlükəsizliyinin təmin olunması naminə xüsusi xidmət orqanlarının əməkdaşlıq münasibətlərinin inkişafından məmnun qaldığını qeyd edib.

İşgüzar şəraitdə keçən görüşdə maraq doğuran bir sıra digər məsələlərə də dair fikir mübadiləsi aparılıb.

Nazir Eldar Mahmudov bu gün həmçinin, Azərbaycanın təhlükəsizlik orqanlarının yaranmasının 90 illik yubiley tədbirlərində iştirak etmək məqsədilə ölkəmizdə səfərdə olan Rusiya Federasiyası Xarici Kəşfiyyat Xidmətinin direktoru Mixail Fradkovla görüşüb.

Görüşdə transmilli mütəşəkkil cinayətkarlıqla, eləcə də hazırda beynəlxalq aləm üçün ən təhlükəli cinayətlərdən olan terrorçuluqla mübarizə sahəsində görülən işlər və digər aktual məsələlər, habelə ölkələrimizin xüsusi xidmət orqanları arasında işgüzar və səmərəli əməkdaşlığın əməli inkişaf perspektivləri üzrə müzakirə aparılıb.

Nazir Eldar Mahmudov respublikada aparılan geniş hüquqi-demokratik dövlət quruculuğu işləri, mövcud əməliyyat şəraiti və ona təsir göstərən amillər, ümumən təhlükəsizlik problemləri ilə əlaqədar Azərbaycanın həyata keçirdiyi tədbirlər, həmçinin Ermənistan-Azərbaycan Dağlıq Qarabağ münaqişəsi, onun doğurduğu fəsadlar haqqında qonağa ətraflı məlumat verib.

Mixail Fradkov 90 illik yubiley münasibətilə bir daha təbriklərini çatdırıb, göstərilən qonaqpərvərliyə və hər iki ölkənin təhlükəsizlik maraqlarının təmin olunması sahəsində aktuallıq kəsb edən məsələlər üzrə müzakirələr üçün yaradılmış şəraitə görə təşəkkürünü bildirib. Qonaq respublikamıza səfərindən xoş təəssüratlar aldığını, Rusiya və Azərbaycan, eləcə də müvafiq strukturlar arasında münasibətlərin inkişafından məmnun qaldığını və bunun ölkələrimizin əlaqələrinin daha da möhkəmlənməsi üçün faydalı olacağına əminliyini qeyd edib.

Səmimi və qarşılıqlı anlaşma şəraitində keçən görüşdə maraq doğuran bir sıra digər məsələlər üzrə də fikir mübadiləsi aparılıb.