Daxili siyasət

Ana səhifə

Daxili siyasət

Eldar Mahmudov Azərbaycanda səfərdə olan İtaliya xüsusi xidmət orqanlarının rəhbərləri ilə görüşüb

06 aprel 2009 15:21 (UTC +04:00)

Bakı-APA. Azərbaycanın milli təhlükəsizlik naziri Eldar Mahmudov Azərbaycan Respublikasının təhlükəsizlik orqanlarının yaranmasının 90 illik yubiley tədbirlərində iştirak etmək məqsədilə ölkəmizdə səfərdə olan İtaliya Daxili Kəşfiyyat və Təhlükəsizlik Agentliyinin Baş direktoru prefekt Ciorcio Piççirillo ilə görüşüb. Bu barədə APA-ya MTN İctimai Əlaqələr Mərkəzindən məlumat verilib. Qonaqları səmimi salamlayan nazir Eldar Mahmudov regionda gedən proseslər, reallıqlar və meydana çıxan müxtəlif növ təhdidlər, habelə Ermənistan-Azərbaycan Dağlıq Qarabağ problemi və ondan irəli gələn fəsadlar barədə danışıb. Eldar Mahmudov beynəlxalq terrorçuluq, narkotiklərin qanunsuz dövriyyəsi, qeyri-leqal miqrasiya və transmilli mütəşəkkil cinayətkarlığın digər təhlükəli təzahürləri ilə əlaqədar Milli Təhlükəsizlik Nazirliyində yeni təhdidlərə qarşı həyata keçirilən adekvat tədbirlər və onların konkret nəticələri barədə qonağa məlumat verib.

Ciorcio Piççirillo 90 illik yubiley münasibətilə bir daha təbriklərini çatdırıb, göstərilən yüksək qonaqpərvərliyə, geniş və dolğun məlumata görə təşəkkürünü bildirib. Qonaq respublikamıza ilk gəlişindən xoş təəssürat aldığını, Azərbaycanın və İtaliyanın təhlükəsizlik maraqlarının təmin olunması sahəsində aktuallıq kəsb edən məsələlər ətrafında aparılan müzakirələrin nəticələrindən razı qaldığını qeyd edib, səfərinin ölkələr, eləcə də müvafiq strukturlar arasındakı əlaqələrinin daha da möhkəmlənməsi üçün faydalı olacağına əminliyini bildirib. Görüşdə qarşılıqlı maraq doğuran bir sıra digər məsələlərə dair də fikir mübadiləsi aparılıb, təhlükəsizlik işinin səmərəli təmin olunması baxımından təcrübə və məlumat mübadiləsinin genişləndirilməsinin vacibliyi vurğulanıb.

Milli təhlükəsizlik naziri Eldar Mahmudov həmçinin Azərbaycan təhlükəsizlik orqanlarının yaranmasının 90 illik yubiley tədbirlərində iştirak etmək məqsədilə ölkəmizdə səfərdə olan İtaliya Xarici Kəşfiyyat və Təhlükəsizlik Agentliyinin Baş direktoru vitse-admiral Bruno Brançiforte ilə görüşüb. Qonaqları səmimi salamlayan nazir Eldar Mahmudov, onlara milli təhlükəsizlik sahəsində qəbul edilmiş qanunvericilik aktları, aparılan müvafiq islahatlar barədə məlumat verib, regionda əməliyyat şəraitinə təsir edən proseslər, meydana çıxan müxtəlif növ təhlükələr və təhdidlər barədə danışıb. Nazir Eldar Mahmudov transmilli mütəşəkkil cinayətkarlığın, o cümlədən beynəlxalq terrorçuluq, narkotiklərin qanunsuz dövriyyəsi, qeyri-leqal miqrasiya və digər təhlükəli təzahürlərin artmasının bütün dünyada ciddi narahatçılıq doğurduğunu qeyd edib, bununla əlaqədar Milli Təhlükəsizlik Nazirliyinin yeni təhdidlərə qarşı həyata keçirdiyi adekvat tədbirlərin konkret nəticələrini qonaqların diqqətinə çatdırıb.

Bruno Brançiforte 90 illik yubiley münasibətilə bir daha azərbaycanlı həmkarlarını təbrik edib, göstərilən yüksək qonaqpərvərliyə, ətraflı məlumata görə təşəkkürünü bildirib. Qonaq respublikamıza ilk səfərindən xoş təəssürat aldığını, hər iki dövlətin təhlükəsizliyi üçün əhəmiyyət kəsb edən məsələlərə dair aparılan müzakirələrin nəticələrindən razı qaldığını qeyd edib, eləcə də İtaliya və Azərbaycan xüsusi xidmət orqanları arasındakı əməkdaşlıq əlaqələrinin inkişafından məmnun olduğunu bildirib. İşgüzar və qarşılıqlı anlaşma şəraitində keçən görüşdə maraq doğuran bir sıra digər məsələlərə də dair fikir mübadiləsi aparılıb.