Daxili siyasət

Ana səhifə

Daxili siyasət

Azərbaycanın bəzi siyasətçiləri ABŞ prezidentinə etiraz edir

05 may 2009 12:32 (UTC +04:00)

Bakı. Elnur Məmmədli - APA. Yeni Azərbaycan Partiyası (YAP) ABŞ prezidenti Barak Obamanın 3 May Dünya Mətbuat Azadlığı Günü ilə bağlı çıxışında Azərbaycanı mətbuat azadlığı olmayan ölkələr sırasında göstərməsinə etiraz edib. YAP icra katibinin müavini, millət vəkili Mübariz Qurbanlı APA-ya açıqlamasında bildirib ki, Barak Obamanın çıxışında Azərbaycanın adının çəkilməsi məntiqə uyğun deyil. M. Qurbanlının sözlərinə görə, Azərbaycanda mətbuat azadlığı ilə bağlı heç bir problemin olmamasından hamı xəbərdardır. O, Azərbaycanda heç bir mətbuatın azadlığını məhdudlaşdıran addım atılmadığını, ölkədə azad mətbuatın fəaliyyət göstərdiyini bildirib: “Belə olan şəraitdə ABŞ prezidentinin dünya mətbuatında vəziyyətlə əlaqədar çıxışında Azərbaycanın adının çəkilməsi həm təəssüf, həm də təəccüb doğurur. ABŞ və Azərbaycan strateji tərəfdaş ölkələrdir, ölkələrimiz arasında əlaqələr inkişaf edir. Eyni zamanda ABŞ-ın müxtəlif nümayəndələri vaxtaşırı Azərbaycana səfərlər edir, ölkədə söz və mətbuat azadlığının vəziyyətini, söz və mətbuat azadlığına dövlət təminatının olduğunu aydın görürlər. Biz YAP olaraq ABŞ prezidentinin bu çıxışından narazıyıq və hesab edirik ki, görünür, Obamaya köməkçiləri yanlış məlumatlar verirlər”. M. Qurbanlı bu gün dünyanın ayrı-ayrı ölkələrində mətbuata basqıların olduğunu, hətta ABŞ-ın özündə də mətbuatın vəziyyətinin ideal olmadığını qeyd edib: “Lakin Azərbaycanı geridə qalmış və mətbuat azadlığının məhdudlaşdırıldığı ölkələrə eyni sırada göstərmək məntiqi deyil. İstərdik ki, gələcəkdə ABŞ prezidenti üçün məlumat hazırlayanlar Azərbaycanın Avropanın mətbuat azadlığına xas ölkələr sırasında olduğunu nəzərə alsınlar. Azərbaycanı mətbuat azadlığına basqı olan ölkələr sırasında göstərmək ədalətsizlikdir”.

Millət vəkili Zahid Oruc da B. Obamanın çıxışın ədalətsiz hesab edir. Onun APA-ya bildirdiyinə görə, Azərbaycanla bağlı səslənən fikrin yanlış olduğunu göstərən kifayət qədər fakt var: “Bu faktlara ABŞ-ın Azərbaycandakı səfiri də qoşular. Çünki bir neçə gün əvvəl səfir bu mövzuda məqalə ilə çıxış edərək müəyyən uğurlardan bəhs edib. Ona görə də düşünürəm ki, Obamanın məsləhətçiləri fəaliyyətlərini səfirlikləri ilə uzlaşdırmalıdır. Digər tərəfdən, Azərbaycanda söz və mətbuat azadlığının bərqərar olunması ilə bağlı çoxlu addım atılıb. Buna Mətbuata Dövlət Dəstəyi Şurasının yaradılmasını, redaksiyaların borclarının dondurulması və s. aid etmək olar. ABŞ-ın bir tərəfdən Azərbaycana strateji tərəfdaş adlandırması, bir sıra sahədə əməkdaşlıq etməsi, amma hər hansı daxili problemi əsas götürərək belə bir yerə layiq görməsi ciddi paradoksdur, bu, təəssüf doğurur”. Z. Orucun sözlərinə görə, Azərbaycan torpaqlarının Ermənistan tərəfindən işğal faktını bir kənara qoyaraq, 2-3 jurnalistin həbsxanaya düşməsini bütövlükdə söz azadlığının vəziyyəti kimi dəyərləndirmək ABŞ tərəfinin bu məsələdə ədalətli olmadığını sübut edir.

Bütöv Azərbaycan Xalq Cəbhəsi Partiyasının (BAXCP) sədri Qüdrət Həsənquliyev isə APA-ya açıqlamasında ABŞ prezidentinin ənənəsinə sadiq qalaraq, cəsarətsiz, qərəzli və ermənipərəst mövqedən çıxış etdiyini deyib. Azərbaycanda jurnalistika ilə bağlı bir çox problemin hələ də həllini tapmadığını deyən Q. Həsənquliyev Obamanın söz azadlığının məhdudlaşdırıldığı və jurnalistlərə qarşı müxtəlif təzyiqlərin həyata keçirildiyi ölkələrin sırasında birinci olaraq Azərbaycanın adını çəkməsini ermənilərə yarınmaq siyasəti adlandırıb: “Obama bəyanatında Azərbaycanla qonşu ölkələrdən heç birinin adını çəkmir. Halbuki Ermənistanda keçirilən son prezident seçkiləri zamanı, Rusiya və İranda söz və fikir azadlığına edilən amansız basqılar, jurnalistlərin, hətta ABŞ vətəndaşı olan media təmsilçisinin həbsə atılması təkzibolunmaz faktdır”.

Qeyd edək ki, ABŞ prezidenti öz çıxışında dünyanı bir sıra ölkələrində mətbuata basqıların olduğunu deyib: “Planetin hər bir guşəsində həbsdə olan, təzyiqlərə məruz qalan jurnalistlərə rast gəlmək mümkündür. Azərbaycandan Zimbabveyə, Birmadan Özbəkistana, Kubadan Eriteriyaya qədər...”