Daxili siyasət

Ana səhifə

Daxili siyasət

“Təhsil haqqında” qanun layihəsi parlamentin müzakirəsinə tövsiyə olunub - YENİLƏNİB

“Təhsil haqqında” qanun layihəsi parlamentin müzakirəsinə tövsiyə olunub - <font color=red>YENİLƏNİB</font>

16 iyun 2009 10:22 (UTC +04:00)

APA-nın xəbərinə görə, layihəni komitə sədri Şəmsəddin Hacıyev təqdim edib. O, hazırda ölkədə təhsilə böyük dövlət qayğısının göstərildiyini, 2009-cu ilin dövlət büdcəsindən bu sahəyə 1 milyard manat vəsait ayrıldığını, təhsilin bütün sahələrini əhatə edən 16 dövlət proqramının həyata keçirildiyini deyib. Ş. Hacıyev bildirib ki, 6 fəsil, 47 maddədən ibrət layihəyə verilən bütün rəy və təkliflər nəzərə alınıb: “Təhsil Nazirliyi tərəfindən qanun layihəsi ilə bağlı 26 maddəni əhatə edən 80-dən artıq təklif daxil olub. Bu təkliflərdən 60-ı tam, 10-u isə qismən nəzərə alınıb. Ədliyyə Nazirliyi 10 maddə üzrə 25, Maliyyə Nazirliyi 14 maddə üzrə 20, Xarici İşlər Nazirliyi 7 maddə üzrə 15, Azərbaycan Milli Elmlər Akademiyası 11 maddə üzrə 20, Səhiyyə Nazirliyi isə 3 təklif irəli sürüb”.

Ş. Hacıyevin sözlərinə görə, Tələbə Qəbulu üzrə Dövlət Komissiyası 3 maddənin qanun layihəsindən çıxarılmasını təklif etsə də, nəzərə alınmayıb: “Komissiya rəyində orta təhsilini başa vuran məzunlara medallar verilməsi və bunun ali məktəbə qəbulda nəzərə alınması, beynəlxalq olimpiadaların qalibi olan şəxslərin müsabiqədənkənar ali məktəblərə qəbulu və magistr hazırlığı ilə bağlı maddənin layihədən çıxarılmasını təklif edib. Biz isə hesab edirik ki, layihədə əksini tapan bu müddəalar neqativ hallara yox, sağlam rəqabətin yaranmasına səbəb olacaq. Hər il 25-30 min məzun arasından olimpiada qaliblərinin sayı 5-10 nəfərdən çox deyil”.

Komitə sədri qanun layihəsinin ancaq 10-dək maddəsinə toxunulmadığını,
digər maddələrə isə müxtəlif məzmunda dəyişikliklər edildiyini deyib. Ş. Hacıyev ölkənin təhsil sistemini xarici və mənfi təsirlərdən qorumaq üçün əcnəbi təhsil müəssisələrinin ölkədəki fəaliyyətinə 3 ildən az olmayaq lisenziyaların verilməsinin nəzərə tutulduğunu deyib. Onun sözlərinə görə, qanun layihəsinə əsasən, 3 yaşından təhsil, 5 yaşından isə məktəbə hazırlıq başlayır. İcbari təhsilin müddəti isə qanun layihəsində göstərilmir. Təhsil müəssisələrin adambaşına maliyyələşdirilməsi həyata keçirilir. Biliyin qiymətləndirilməsi test imtahanları ilə keçirilsə də, tələbələrin yerləşdirilməsi onların öz istəyi ilə baş tutur. Təhsilin pillələri və səviyyələri məktəbəqədər təhsildən, ümumi təhsildən, ilk peşə-ixtisası təhsilindən, orta peşə-ixtisası təhsilindən və ali təhsildən ibarətdir. Ümumi təhsilə ibtidai təhsil, ümumi orta təhsil və tam orta təhsil daxildir. Ali təhsilə isə bakalavriat, magistratura və doktorantura daxildir.

Müzakirələrdə çıxış edən təhsil naziri Misir Mərdanov qanun layihəsinin yüksək səviyyədə hazırlandığını deyib. Nazir qanun layihəsində təhsil alanların və təhsil verənlərin geyim formaları ilə bağlı məsələyə dəyişiklik edilməsini təklif edib. Onun sözlərinə görə, orta məktəbdə vahid geyim formasının tətbiqi qəbul edilsə də, ali məktəb tələbələri və müəllimlərə qarşı bu qaydaların tətbiq edilməsi başa düşülən deyil.

Deputat Əli Əhmədov qanun layihəsinin tezliklə qəbul edilməsinin tərəfdarı olduğunu bildirsə də, xarici təhsil müəssisələrinin fəaliyyəti üçün lisenziyaların 3 il müddətinə verilməsinin əleyhinə çıxıb: “Bu müddət uzadılmalıdır”.

Xarici İşlər Nazirliyi yanında Diplomatik Akademiyanın rektoru Hafiz Paşayev isə terminlərin dəqiqləşdirilməsi və dil qüsurlarının aradan qaldırılması ilə bağlı layihə üzərində iş aparılmasının vacibliyini vurğulayıb.

Milli Məclisin vitse-spikeri Bahar Muradova sənədin son oxunuşda qəbul edilməsi üçün elə bir maneə görmədiyini diqqətə çatdırıb.

Müzakirələrdən sonra sənəd parlamentin növbədənkənar sessiyasının iyunun 19-da keçiriləcək iclasına tövsiyə olunub.

“Təhsil_haqqında”_qanun