Daxili siyasət

Ana səhifə

Daxili siyasət

MTN-nin Heydər Əliyev Adına Akademiyasında növbəti buraxılışa həsr olunmuş təntənəli mərasim keçirilib - FOTOSESSIYA

MTN-nin Heydər Əliyev Adına Akademiyasında növbəti buraxılışa həsr olunmuş təntənəli mərasim keçirilib - <font color=red>FOTOSESSIYA</font>

13 iyul 2009 11:53 (UTC +04:00)

Bakı-APA. Milli Təhlükəsizlik Nazirliyinin Heydər Əliyev adına Akademiyasının əməliyyat işçilərinin hazırlanması fakültəsinin birinci və Sərhəd Qoşunları fakültəsinin növbəti buraxılışına həsr olunmuş təntənəli mərasim keçirilib.

MTN-nin ictimai əlaqələr mərkəzindən APA-ya verilən məlumata görə, Akademiyanın döyüş bayrağı hərbi marşın sədaları altında meydana gətirilib. Əvvəlcə milli təhlükəsizlik naziri, general-leytenant Eldar Mahmudov, Dövlət Sərhəd Xidmətinin rəisi, general-leytenant Elçin Quliyev, Azərbaycan Prezidentinin müdafiə məsələləri üzrə köməkçisi, general-leytenant Vahid Əliyev, Akademiyanın rəisi general-leytenant Ziya Yusifzadə və digər rəsmi qonaqlar Heydər Əliyevin Akademiyanın həyətindəki abidəsi önünə əklil qoyub, onun xatirəsini ehtiramla yad ediblər.

Milli təhlükəsizlik naziri Eldar Mahmudov buraxılış mərasiminə düzülmüş zabitləri və kursantları tribunadan təbrik edib. Akademiyanın qarşısında duran mühüm vəzifələrdən danışan Eldar Mahmudov, gənclərin yüksək vətənpərvərlik ruhunda tərbiyə olunduduğunu xüsusi qeyd etmiş, vəzifə borcuna məsuliyyətlə yanaşmağın, nizam-intizama riayət etməyin, dərin biliklərə və peşəkarlıq vərdişlərinə yiyələnməyin vacibliyini bildirib. Milli təhlükəsizlik naziri respublikanın sosial-iqtisadi, ictimai-siyasi həyatının bütün sahələrində uğurlu islahatların həyata keçirildiyini, Azərbaycanın dinamik inkişaf edərək bölgənin lider dövlətinə çevrildiyini qeyd edib, ölkəmizin təşəbbüsü və yaxından iştirakı ilə reallaşan beynəlxalq iqtisadi layihələrin təhlükəsizliyinin daha etibarlı təmin edilməsinin çox məsuliyyətli vəzifə olduğunu, milli təhlükəsizliyə cavabdeh orqanların əməkdaşlarından daha yüksək peşəkarlıq, tapşırıqların icrasında çeviklik və səriştə tələb edildiyini məzunların diqqətinə çatdırıb.

Dövlət Sərhəd Xidmətinin rəisi, general-leytenant Elçin Quliyev də çıxış edərək məzunları təbrik etmiş, silahlı qüvvələrimizin tərkibinə növbəti zabit nəslinini verilməsində zəhməti və əziyyəti olan hər bir kəsə, o cümlədən Milli Təhlükəsizlik Nazirliyinin rəhbərliyinə, Akademiyanın professor-müəllim heyətinə, məzunların valideynlərinə dərin minnətdarlığını bildirib. “Bu günə qədər hər biriniz üçün məsuliyyət daşıyırdılar, bu gün bu zabit libasını geyinərək hər biriniz məsuliyyət daşıyıcı oldunuz” deyən Elçin Quliyev gənc zabitlərin bu səviyyəyə gəlib çatmasında dövlətin diqqət və qayğısını xüsusi qeyd edib.

Milli Təhlükəsizlik Nazirliyinin Heydər Əliyev adına Akademiyasının rəisi, general-leytenant Ziya Yusifzadə çıxış edərək Prezident İlham Əliyevin milli təhlükəsizlik orqanlarına olan diqqət və qayğısı, milli təhlükəsizlik naziri general-leytenant Eldar Mahmudovun yüksək təşkilatçılığı sayəsində Akademiyanın inkişafından danışıb. Ziya Yusifzadə, sıralarında bir Prezident təqaüdçüsü və iki Heydər Əliyev təqaüdçüsü olan fakültələrin məzunlarının 5 illik tədris müddətində daim yüksək nailliyyətlər qazandıqlarını, akademiyanın elmi, ictimai, siyasi həyatında fəal iştirak etdiklərini, 31 nəfər zabitin fərqlənmə diplomu ilə bitirdiyini diqqətə çatdırıb.

Akademiyanın məzunları, gənc leytenantlar Atamoğlan Hüseynov və Seymur Xəlilov çıxış edərək, Heydər Əliyevin adını daşıyan xüsusi ali təhsil ocağını bitirmələrindən qürur hissi keçirdiklərini bildirib, onlara göstərilən yüksək diqqət və qayğıya görə Azərbaycan prezidenti İlham Əliyevə, Milli Təhlükəsizlik Nazirliyinin, Dövlət Sərhəd Xidmətinin və akademiyanın rəhbərliyinə, müəllim kollektivinə minnətdarlıq edib, bütün məzunların adından Vətənə sədaqətlə xidmət edəcəklərini bildiriblər. Sonra milli təhlükəsizlik naziri Eldar Mahmudov və Dövlət Sərhəd Xidmətinin rəisi Elçin Quliyev Akademiyanı fərqlənmə ilə bitirən məzunlara diplomları təqdim ediblər. Digər zabitlərə də diplomlar təqdim olunduqdan sonra Akademiyanın zabit və kursantları orkestrin müşayiəti ilə hərbi marşla tribunanın önündən keçiblər. Sonra tədbir Akademiyadakı “Şöhrət” Muzeyində davam etdirilib. Muzeyin təntənə salonunda milli təhlükəsizlik naziri Eldar Mahmudov və dövlət sərhəd xidmətinin rəisi Elçin Quliyev Akademiyanı fərqlənmə ilə bitirən zabitlərə qiymətli hədiyyələr veriblər.