Daxili siyasət

Ana səhifə

Daxili siyasət

Ceyhun Osmanlı: “Emin və Adnanın həbsi ilə bağlı xarici ölkə səfirliklərinin prosesə birbaşa müdaxiləsi anlaşılan deyil”

15 iyul 2009 10:23 (UTC +04:00)

Bakı. Ramil Məmmədli - APA. “Bir Azərbaycan gənci kimi hadisələrin belə inkişafı məni təəssüfləndirir. Xüsusilə kənardan olan və prosesdən xəbərsiz insanların məsələyə müdaxilə etməsi prosesləri daha da qəlizləşdirir və kontekstdən çıxarır. Məsələn, “Yeni Müsavat” qəzeti istintaqda olan gəncləri hansısa “narıncı inqilab”la əlaqələndirir, digərləri də başqa versiyalar irəli sürür”. Bunu APA-ya açıqlamasında “İrəli” İctimai Birliyinin sədri Ceyhun Osmanlı Adnan Hacızadə və Emin Abdullayevin (Milli) həbsinin müxtəlif formalarda şərh edilməsinə münasibət bildirərkən deyib.

C. Osmanlı bildirib ki, bu hadisədən siyasi divident və sosial bazasını genişləndirmək üçün istifadə etmək istəyənlər də var: “Bəzi fəaliyyətsiz müxalifət partiyaları bu məsələdən istifadə edərək, sanki bu prosesin önündə getməyə, gənclər arasında öz sosial bazalarını genişləndirməyə və istintaqda olan gənclərin adından istifadə edərək özlərini reklam etməyə cəhd edirlər.

Başqa bir tərəfdən isə bu hadisələrdən sui-istifadə edən bəzi xarici media qurumları, sanki Azərbaycanın əleyhinə təbliğat aparmaq üçün şans tapıblar. 14 İyulda Gürcüstanda fəaliyyət göstərən Olesya Vartanyan adlı erməni jurnalistin şərhləri əsasında “New York Times” qəzetində dərc edilmiş yazı bunun əyani sübutudur.

Lakin istənilən halda proseslərin bu məcrada inkişafı Adnan və Eminin xeyrinə deyil, əleyhinədir. Əlbəttə ki, heç biz nəinki Adnan və Eminin, hətta istənilən bir Azərbaycan gəncinin həbsdə olmasını istəmərik. Lakin ortada bir istintaq prosesi var. Bu prosesin ədalətlə aparılacağına inanırıq və ümid edirik ki, bunun nəticəsində ədalətli qərar qəbul olunacaq. Odur ki, hesab edirəm ki, Emin və Adnanın azad olunmasının limiti tükənməyib, lakin istənilən halda bu məsələ öz həllini Azərbaycan hüdudlarından kənarda deyil, Azərbaycan hüdudları daxilində tapacaq”.

C. Osmanlı diplomatik korpusun məsələyə münasibətini anlamadığını deyib: “Bu məsələdə xarici ölkə səfirliklərinin prosesə birbaşa müdaxiləsi anlaşılan deyil. Xarici ölkə səfirlikləri nəyi, kimin diqqətinə çatdırmaq istəyirlər? Əgər onlar Azərbaycanın daxili məsələsini azərbaycanlıların özünə çatdırmaq istəyirlərsə, hesab edirəm ki, buna ehtiyac yoxdur, çünki biz bu məsələdən kifayət qədər xəbərdarıq və prosesləri diqqətlə izləyirik.

Yox əgər istənilən bir xarici ölkə Azərbaycan dövləti ilə təzyiq dili ilə danışırsa, hesab edirəm ki, bu özünü azərbaycanlı adlandıran hər bir kəsə həmin ölkə tərəfindən hörmətsizlikdir.

Lakin biz tam əksinə bu gün səfirliklər tərəfindən başqa münasibətin şahidiyik. Sadə bir misal deyim: “Bəzən heç bir səbəb olmadan bir çox xarici ölkə səfirlikləri, heç bir əsas olmadan Azərbaycan vətəndaşlarına viza verməkdən imtina edir və bu məsələyə şərh belə vermək istəmirlər. Misal üçün qeyd edim ki, bir neçə Azərbaycan gənci 3 gün sonra Finlandiyada start götürəcək Olimpiadaya könüllü qismində dəvət alsalar da onlara viza verməyə borclu olan Norveçin Azərbaycandakı səfirliyi heç bir əsas olmadan bundan imtina edib. Baxmayaraq ki, Finlandiya tərəfi dəfələrlə Norveç səfirliyinə azərbaycanlı könüllülərə viza verilməsi ilə bağlı müraciət edib. Eyni məsələni bəzi digər xarici ölkə səfirliklərinə də aid etmək olar. Bəs sual olunur, əgər xarici ölkə səfirliklərini Azərbaycan vətəndaşının hüququ həqiqətən bu qədər maraqlandırırsa, niyə onda bizim vətəndaşlara qarşı belə hörmətsizlik edirlər? Başqa bir faktı qeyd edim ki, bəzi xarici ölkə səfirliklərində bu günə qədər elanlar və ərizə formaları Azərbaycan dilində yox, başqa dillərdədir. Bəs yaxşı niyə Azərbaycanın “təəssübkeşliyini çəkən” həmin səfirliklər Azərbaycan dilinə, Azərbaycan qanunlarına hörmətlə yanaşmır?

Bu misalların sayını artırmaq da olar. Lakin bir sözlər onu qeyd etmək istərdim ki, hər bir qurum öz mandatına uyğun fəaliyyət göstərməlidir”.

C. Osmanlı vurğulayıb ki, istintaq işini mövcud kontekstdən çıxarıb siyasiləşdirmək, müxtəlif don geyindirmək, Emin və Adnan da daxil olmaqla azərbaycanlıların əleyhinə, Azərbaycanı istəməyən qüvvələrin isə xeyrinə yönəlib: “Biz bu məsələdə ayıq-sayıqlığımızı itirməməliyik”.