Daxili siyasət

Ana səhifə

Daxili siyasət

Qüdrət Həsənquliyev: “Protokolların Kişinyov görüşü ərəfəsində meydana çıxmasının Azərbaycana təzyiq vasitəsi olduğuna heç bir şübhəm yoxdur” - MÜSAHİBƏ

10 sentyabr 2009 08:50 (UTC +04:00)

Bakı. Elnur Məmmədli – APA. Bütöv Azərbaycan Xalq Cəbhəsi Partiyasının sədri, millət vəkili Qüdrət Həsənquliyevin APA-ya müsahibəsi:

- Ermənistanla Türkiyə arasında münasibətlərin normallaşdırılması üçün başlanılmış növbəti mərhələyə Sizin rəhbərlik etdiyiniz partiyada digərlərindən daha sərt mövqe nümayiş etdirir...

- Təəssüf ki, Türkiyə təzyiqlər altında işğalçı Ermənistanla sərhədləri açmaq və diplomatik əlaqələr qurmaq barədə üzərinə öhdəlik götürüb. Əslində, bu çoxdan baş verib, sadəcə indi açıqlanır. Digər tərəfdən, o da təəssüf doğurur ki, bu fakt ortada ola-ola cəmiyyətin bəzi sadəlövh üzvləri, Türkiyə ilə özlərinin daha çox bağlı olduqlarını göstərmək istəyənlər guya bu ölkənin təəssübkeşi olduqlarını nümayiş etdirmək üçün Azərbaycanı günahlandırmağa çalışırlar. Özünü siyasətçi adlandıran bəzi şəxslər müdrik görkəm alaraq, bu prosesdə günahı daha çox Azərbaycanda axtarmağa başlayıblar. Lakin aydındır ki, həmin protokollarda Azərbaycanla bağlı heç nə yoxdur və Ərdoğan hökuməti sərhədləri açmağa hazırlaşır. İndi bəzi diplomatlar fikir söyləyir ki, bu protokollar parlamentdə qəbul olunmaya bilər. Bu da çox pis və az mümkün olan haldır. Çünki Türkiyə parlamentində böyük çoxluğun məhz AKP-yə məxsus olduğunu bütün dünya bilir. Belə olan halda, həmin partiyanın hökumətdəki təmsilçilərinin irəli sürdükləri protokolu parlamentdəki üzvləri necə dəstəkləməyəcəklər? Belə bir hal baş verəcəksə, bunun dünya gücləri qarşısında Türkiyənin açıqlaması nə olacaq? Bu da Türkiyənin beynəlxalq imicinə daha çox zərbə vurmuş olacaq. Başqa tərəfdən bizim bəzi “siyasətçilər” deyirlər ki, Türkiyə nə etsin, Azərbaycanı 16 il gözlədi. Bu kökündən yanlış yanaşmadır. Fakt odur ki, Azərbaycan bu problemi həll edə bilmirsə, deməli, Türkiyə də həll edə bilmir. Bu dövlətlər qardaşdır, problemləri birgə çözməlidirlər. İndi kim belə bir iddia irəli sürə bilər ki, Türkiyə 20 ildir ki, PKK problemini həll edə bilmir, deməli, PKK ilə əlaqə qurmaq lazımdı. Belə gülünc iddia ilə kim çıxış edə bilər? Amma PKK Türkiyə üçün hansı vəhşilikləri, terroru edibsə, ermənilər Azərbaycan üçün ondan daha betərini ediblər.

Ərdoğan Davos forumunda müsəlmanların təəssübkeşi kimi çıxış edirdi, AKP iqtidarı hər zaman dindən faydalanıb. Bəs indi nə oldu, biz müsəlman deyilik? Ona görə də biz sentyabrın 15-də qəhrəman türk əsgərlərinin abidəsini ziyarət edəndən sonra Türkiyə səfirliyi qarşısında etiraz aksiyası keçirəcəyik. Aksiyada “One minute, Davos fatehi, biz də müsəlmanıq!”, “Yaşasın türk birliyi!”, “Sizin bu addımınızdan sonra farslar və ruslardan fərqiniz nədir?” şüarları səsləndiriləcək.

Bu proseslər bir də onu da göstərir ki, Azərbaycan xalqı yalnız özünə güvənməlidir. Azərbaycan vətəndaşları bir olmalı, ordu güclənməlidir. Peşəkar ordu qurmalı və Ermənistana təsir etməliyik. İşğalçıya təsir edən yeganə faktor ordunun gücüdür.

- Birinci dəfə sərhədlərin açılması məsələsi gündəmə gələrkən Türkiyənin daxilində buna ciddi etiraz vardı. Amma bu dəfəki etirazlar bir qədər zəifdir. Səbəb nədir?

- Uzun müddət zaman keçir, məsələ bir neçə dəfə gündəmə çıxarılır və insanlar üçün adiləşdirilir. Birinci dəfə bu mövzu gündəmdən çıxarılanda da məqsəd bu idi. Türkiyədə bəziləri fikirləşir ki, bu addımla guya Ermənistanla dostlaşacaqlar. Bu kökündən yanlışdır. Ermənistan onsuz da imkan düşən kimi Türkiyəyə öz zərbəsini vuracaq. Əlverişli məqam olan kimi Türkiyəyə qarşı ərazi iddiaları irəli sürəcək, soyqırım məsələsini gündəmə gətirəcək. Ona görə də sərhədlərin açılması ilə problemlərin həll olunacağını düşünənlər yanılırlar.

- Belə bir fikir var ki, Türkiyə və Ermənistan arasındakı danışıqların müəyyən mərhələsində 5 rayon işğaldan azad edilir. Bunun ardınca sərhədlər açılır və Türkiyə Ermənistan qarşısında Azərbaycanın işğal olunmuş digər ərazilərini azad etmək üçün konkret vaxt qoyur. Həmin vaxt ərzində torpaqlar azad edilməsə yenidən sərhəd bağlanır. Bu, nə qədər inandırıcıdır?

- Bu, cəfəngiyatdır. Bu söhbətlər ortaya çıxandan sonra Serj Sarkisyan bir neçə dəfə bəyan edib ki, dünyada Dağlıq Qarabağın Azərbaycanın tərkibində qalmasına razı olacaq erməni yoxdur. Sonuncu dəfə isə Dağlıq Qarabağı heç vaxt Azərbaycana qaytarmaq istəyində olmayacaqlarını bildirdi. Bütün bunlardan sonra sərhədlərin açılmasının guya Azərbaycanın maraqlarına uyğun olması barədə fikir söyləmək cəfəngiyatdan başqa bir şey deyil. Əgər söhbət Dağlıq Qarabağın ətrafındakı rayonların qaytarılaraq, Dağlıq Qarabağ Ermənistana verilməsilə müqavilə imzalanmasından gedirsə, bunu ermənilər istəyə bilər. Dünyanın heç bir yerində, tarix boyu hansısa işğalçı dövləti şirnikləndirməklə onu işğal etdiyi torpaqlardan çıxarmaq mümkün olmayıb. Bunun yolu odur ki, işğalçıya təzyiqlər edilməlidir, milli müqavimət, partizan müharibələri təşkil olunmalıdır.

- Protokollar açıqlanan kimi bunu ABŞ və Fransa təqdir etdi. Bunu necə qiymətləndirirsiniz?

- Rusiyanın bu prosesdə guya kənarda görünmək istəyi də məqsədlidir. Rusiya bilir ki, onun bu prosesdə iştirakı Azərbaycan və Türkiyədə qıcıq doğura bilər. İndi Rusiya özünü kənarda göstərir. Amma mən bildirirəm ki, Ermənistanla Türkiyənin sərhədləri açılandan sonra Gürcüstan üçün çox ağır günlər başlayacaq. Ermənistan Türkiyə üzərindən Avropaya çıxış əldə edəndən sonra daha böyük iddialar ortaya qoyacaq. Artıq Gürcüstanla bağlı iddialara başlayıb belə. Əhməd Davudoğlunun Gürcüstana səfəri də bununla bağlı idi. Guya Türkiyə bu sərhədləri açmaqla bölgəyə sülh gətirdiyini düşünür. Amma əslində bununla bölgəyə yeni müharibələr gətirir, tarazlığı pozur. Türkiyənin bu siyasəti axıra qədər hesablanmayıb və bunun nəticələrini Türkiyənin özü də görəcək. Ermənistanın Gürcüstana ehtiyacı azalandan sonra Qafqazda başlayacaq müharibələrin qarşısını Türkiyə ala bilməyəcək. Yəni bundan sonra Ermənistanın kiməsə güzəştə getməsindən danışmaq olmaz. Dünyada hər zaman işğalçıya sanksiyalar tətbiq olunub, onun güclənməsi üçün güzəştli addımlar atılmayıb.

- Bu protokolların indiki mərhələdə açıqlamasının prezidentlərin Kşinyov görüşünə hesablanması ilə bağlı səslənən fikirləri necə qiymətləndirirsiniz?

- Hər bir halda bu protokolların gündəmə gəlməsi görüşə təsir edəcək. Güman ki, Ermənistan son olanlardan daha da ruhlanaraq, aqressiyasını artıracaq.

Bu protokolların məhz Kişinyov görüşü ərəfəsində meydana çıxmasının həm də Azərbaycana təzyiq vasitəsi olduğuna heç bir şübhəm yoxdur. Avropa Birliyi, Amerika Türkiyəni Azərbaycandan ayırmaqla bizi təkləmək və güzəştlərə getməyə məcbur etmək siyasəti yürüdür. Onlar artıq bu istəyin bir hissəsinə nail olmaq üzrədirlər. Azərbaycan hər zaman Türkiyəyə güvənib, bu dövlətlə fəxr edib. Amma indi Türkiyənin mövqeyi də ortadadır.

- ABŞ yeni həmsədr təyin etdi, bu proseslərdə ciddi dəyişiklik yaradacaqmı?

- Heç nə dəyişməyəcək. Ayrı-ayrı diplomatlar dövlətin siyasətini yerinə yetirib, tapşırıqları icra edirlər. ABŞ-ın da siyasəti odur ki, Azərbaycan güzəştə getməlidir. Əslində bu dünyada hərbi zorakılığı dəstəkləyən bir siyasətdir. Bu, ikili standartlar üzərində qurulmuş siyasətdir. Bu siyasətlə də Qafqazda heç vaxt sülhə nail olmaq mümkün olmayacaq. Azərbaycanın prezidenti bildirib ki, o heç bir halda Dağlıq Qarabağın müstəqilliyinə yol açan sənədə imza atmayacaq. Ola bilməz ki, Azərbaycan xalqını təslimçi bir sülhə məcbur etsinlər.