Daxili siyasət

Daxili siyasət

Prezident Administrasiyası ictimai-siyasi şöbəsinin müdiri və Ali Məhkəmənin sədri DSK sədrləri üçün məruzə oxuyublar

10 sentyabr 2009 12:13 (UTC +04:00)

Bakı. Elnur Məmmədli – APA. Mərkəzi Seçki Komissiyasının (MSK) dairə seçki komissiyalarının sədrləri üçün təşkil etdiyi kurslar davam edir. APA-nın məlumatına görə, bugünkü kursda Prezident Administrasiyası ictimai-siyasi şöbəsinin müdiri Əli Həsənov “Bələdiyyə seçkiləri zamanı aşkarlığın təmini və seçkiqabağı təşviqatın aparılmasında KİV-in rolu” mövzusunda məruzə ilə çıxış edib. Şöbə müdiri Azərbaycanda seçki prosesinin hər il təkmilləşdirildiyini və Azərbaycan seçicilərinin 90-cı illərin seçicisi olmadığını deyib: “O zaman bir çox hallarda evin ağsaqqalı bir neçə pasportla gələrək hamının yerinə səs vermək istəyirdi. Amma indi hər kəs bilir ki, səs vermək hüququ hər bir şəxsin özünə məxsusdur”.

Ə. Həsənov Avropa Şurası və digər beynəlxalq qurumlarla seçki qanunvericiliyinin təkmilləşdirilməsi, seçki qanunlarının Avropa standartlarına uyğunlaşdırılması istiqamətində iş aparıldığını qeyd edib. O, təbliğat-təşviqat kampaniyasının aparılması üçün bütün tərəflərə bərabər imkanların yaradılmasının vacib olduğunu söyləyib: “Amma bəzən Avropanın seçki institutları öz ölkələrinə rəva görmədiklərini bizdən tələb edirlər. Bildirirlər ki, müxalifət harada istəyir, orada aksiya keçirməlidir. Halbuki bu məsələlər qanunlarla tənzimlənir və kütləvi aksiyalar üçün müvafiq yerlər ayrılır”.

Ali Məhkəmənin sədri Ramiz Rzayev “Seçki hüquqlarının məhkəmə müdafiəsi. Milli və beynəlxalq təcrübə” mövzusunda çıxış edib. O, Azərbaycan qanunvericiliyində seçki hüquqları ilə bağlı məsələləri DSK sədrlərinin diqqətinə çatdırıb, onların bir sıra suallarını cavablandırıb.

Mərkəzi Seçki Komissiyasının ümumi şöbəsinin müdiri Elşən Əsgərov isə “Dairə seçki komissiyalarında sənədləşmə, kargüzarlığın təşkili və aparılma qaydaları” mövzusunda çıxış edib.

Qeyd edək ki, kurslar İnsan hüquqları üzrə Milli Fəaliyyət Planına əsasən keçirilir.