Daxili siyasət

Daxili siyasət

Azərbaycan prezidenti İlham Əliyev Avropa İttifaqının enerji məsələləri üzrə komissarı Andris Piebalqsı qəbul edib

15 sentyabr 2009 16:36 (UTC +04:00)

Bakı-APA. Azərbaycan prezidenti İlham Əliyev Avropa İttifaqının enerji məsələləri üzrə komissarı Andris Piebalqsı qəbul edib. Bu barədə APA-ya Prezidentin mətbuat xidmətindən məlumat verilib. Andris Piebalqs “Əsrin müqaviləsi”nin 15-ci ildönümü münasibətilə dövlətimizin başçısını təbrik edib və Avropa Komissiyasının sədri Joze Manuel Barrozunun salamlarını Prezident İlham Əliyevə çatdırıb. Bu gün Azərbaycan prezidentinin Bakıda məktəb binasının açılışı ilə bağlı tədbirdə iştirakından məlumatlı olduğunu bildirən qonaq, ölkədə məktəblərin tikintisinə qoyulan vəsaitin gələcək üçün ən yaxşı investisiya olduğunu deyib. Andris Piebalqs Avropa İttifaqının Azərbaycan ilə əməkdaşlığının yüksək səviyyədə olduğunu bildirərək, təmsil etdiyi qurumun bu münasibətlərin genişlənməsində maraqlı olduğunu qeyd edib.

“Əsrin müqaviləsi”nin əhəmiyyətinə toxunan prezident İlham Əliyev ötən 15 il ərzində ölkəmizin böyük inkişaf yolu keçdiyini və energetika sahəsindəki nailiyyətlərin bu uğurların əldə edilməsində önəmli rol oynadığını vurğulayıb. Avropa Komissiyasına sonuncu səfərini xatırlayan dövlət başçısı, bu səfərin uğurlu və faydalı olduğunu deyib. Prezident İlham Əliyev əməkdaşlıq çərçivəsində gələcəkdə də birgə işlərin həyata keçiriləcəyinə ümidvar olduğunu bildirib. Dövlət başçısı qeyd edib ki, Avropa Qonşuluq Siyasəti və Avropa İttifaqının “Şərq Tərəfdaşlığı” proqramı, eləcə də enerji dialoqu bir-biri ilə sıx bağlı olan məsələlərdir və bütün bu istiqamətlərdə yaxşı nəticələr əldə olunub. Prezident İlham Əliyev əminliklə bildirib ki, Avropa İttifaqı ilə əlaqələr daha da möhkəmlənəcək və yeni sahələri əhatə edəcək. Dövlət başçısı Avropa Komissiyasının sədri Joze Manuel Barrozunun salamlarına görə minnətdarlığını bildirdi, onun da salamlarını Avropa Komissiyasının sədrinə çatdırmağı xahiş edib.