Daxili siyasət

Daxili siyasət

Azərbaycan Milli Məclisinin yeni korpusu istifadəyə verilib

25 sentyabr 2009 16:03 (UTC +04:00)

APA-nın məlumatına görə, prezident açılışı bildirən lenti kəsib və yeni korpusla yaxından tanış olub.

Məlumat verilib ki, 2007-ci il noyabrın 3-də Milli Məclisin deputatlarının iş şəraitinin daha da yaxşılaşdırılması məqsədi ilə yeni korpusun təməli qoyulub. Dövlət başçısının göstərişi ilə inşa olunan onbeşmərtəbəli yeni korpusun inşası vaxtından əvvəl başa çatdırılıb. Binanın inşası zamanı milli ornamentlərdən geniş istifadə olunub. Korpusun fasadı Yaponiyadan gətirilmiş alkaponla üzlənib. İlk üç mərtəbə qranit tipli, qalan hissə isə metallik rəngli alkaponla örtülüb. Bu da yeni inzibati binanı parlamentin əsas binasının və digər korpusunun ümumi görünüşünə uyğunlaşdırıb. Yeni inzibati binada sürətli liftlər quraşdırılıb. Bina bütünlüklə müasir sistemlərin köməyi ilə havalandırılacaq.

Yeni korpus parlamentin əsas binasının foyesi ilə birləşdirilib. Birinci mərtəbədə korpusları əlaqələndirən şüşəli salon var. Salonda quraşdırılan monitordan MM-in geniş iclaslarını izləmək mümkündür. Birinci mərtəbədə MM-in arxivinin saxlanması üçün hər cür şərait yaradılıb, yanğından mühafizə və müasir havalandırma sistemi quraşdırılıb.

Binanın ikinci mərtəbəsi müasir kitabxana üçün nəzərdə tutulub.

Kompüterləşdirilmiş iki oxu zalı olan yeni kitabxanada 100 mindən çox kitab və 2000 qovluğun saxlanması üçün xaricdən zəruri avadanlıq gətirilib.

İkinci mərtəbədə MM-in komitə iclaslarının və müxtəlif görüşlərin keçirilməsi üçün üç salon, üçüncü mərtəbədə isə komitələrin birgə iclaslarının, həmçinin ayrı-ayrı görüşlərin keçirilməsini nəzərdə tutan böyük iclas salonu var. Böyük salonda tədbirlərin sinxron tərcüməsi, videoçəkilişlərin aparılması üçün müasir avadanlıq quraşdırılıb. Bundan əlavə, üçüncü mərtəbədə 13 xidməti otaq var. Bu mərtəbədən də Milli Məclisin əsas binasına və keçmiş deputat korpusuna keçid inşa olunub.

Yeni korpusun qalan mərtəbələri isə bütünlüklə deputatlar üçün nəzərdə tutulub. On dörd otaqdan ibarət hər mərtəbədə bir komitə yerləşəcək. Əvvəlki korpusdan fərqli olaraq, bir otaqdan iki-üç deyil, bir deputat istifadə edəcək.

Şüşə ilə əhatələnən 15-ci mərtəbədə böyük tədbirlərin və müxtəlif mərasimlərin keçirilməsi üçün geniş salon var.
MM-in yeni korpusunun nəinki MDB məkanında, hətta bir sıra inkişaf etmiş ölkələrdə belə analoqu yoxdur.

Bina ilə tanışlıqdan sonra prezident İ. Əliyev və xanımına parlamentarizmin inkişafında və parlamentlərarası əlaqələrin möhkəmləndirilməsində müstəsna xidmətlərinə görə Azərbaycan Respublikası Milli Məclisinin Fəxri medalı təqdim edilib.

Prezident İ. Əliyev MM-in yeni korpusunun inşasını, burada yaradılan şəraiti yüksək qiymətləndirib və qanunverici orqanın işinə uğurlar arzulayıb.