Daxili siyasət

Daxili siyasət

Azərbaycan parlamentinin spikeri: “Türkiyə ilə Azərbaycanın arasında təxribat törətməyə çalışanlar var”

20 oktyabr 2009 10:44 (UTC +04:00)

Bakı. Elbrus Seyfullayev-APA. Milli Məclisin bugünkü iclasında millət vəkilləri cari məsələlərlə bağlı çıxış ediblər. APA-nın xəbərinə görə, millət vəkili, Azərbaycanın Avropa Şurası Parlament Assambleyasındakı nümayəndə heyətinin sədri Səməd Seyidov deputatların Türkiyə səfəri barədə məlumat verib. Türkiyədə iqtidar və müxalifət təmsilçiləri ilə görüşdüklərini bildirən S. Seyidov Türkiyənin böyük və qəribəlikləri olan dövlət olduğunu deyib. Türkiyə bir tərəfdən PKK-ya qarşı mübariz aparır, bir tərəfdən “Evrovision”a kürd mahnısı göndərmək istəyir, həm İsraillə, həm də Suriya ilə dostluq edir”.

Millət vəkili deyib ki, Türkiyə və Azərbaycan ictimaiyyəti ehtiyatlı olmalıdır. S. Seyidov Türkiyədə Azərbaycan bayraqlarının təhqir olunmasının, Azərbaycanda bəzi rəmzlərin yandırılmasının yaxşı qarşılanmadığını qeyd edib.

Spiker Oqtay Əsədov da Türkiyə-Azərbaycan münasibətləri barədə danışıb: “Bakıda Azərbaycan-Rusiya futbol matçında Türkiyə bayrağı ən yüksək yerdə asılmışdı. Mən bir dəfə də demişəm, iqtidarlar gəldi gedərdi, xalqlar əbədidir. Türkiyə ilə Azərbaycanın arasında təxribat törətməyə çalışanlar var. Belə qüvvələr ermənidən də pisdir. Türkiyədə Azərbaycan bayrağının təhqir olunduğunu görəndə qüruruma toxundu. Azərbaycan bayrağını alıb başqa yerə qoymaq olardı”.

Deputat Aynur Quliyeva isə Azərbaycan müxalifətinin Türkiyəyə münasibəti barədə danışıb: “Müxalifət 2003-cü ildə İsa Qəmbərə dəstək vermədiyi üçün Türkiyəni düşmən elan eləmişdi. İndi isə əksinə olub. Mən müxalifətə təklif edirəm ki, indiki situasiyada xalqın, hakimiyyətin yanında olsunlar. Türkiyə müxalifəti bu məsələdə bizim müxalifətdən daha aktivdir”.