Daxili siyasət

Daxili siyasət

Ombudsman Beynəlxalq Miqrasiya Təşkilatının təmsilçisini qəbul edib

20 oktyabr 2009 20:04 (UTC +04:00)

Bakı – APA. Azərbaycan Respublikasının İnsan Hüquqları üzrə Müvəkkili Elmira Süleymanova Beynəlxalq Miqrasiya Təşkilatının (BMqT) ölkəmizdəki missiyasının rəhbəri Vasili Yujanini onun xahişi ilə qəbul edib.

Ombudsman Aparatının mətbuat xidmətindən APA-ya verilən məlumata görə, E.Süleymanova miqrasiya proseslərinin dünyada gedən qloballaşmanın göstəricilərindən biri olduğunu və bu proseslərin tənzimlənməsinin hər bir ölkənin inkişafı və təhlükəsizliyi baxımından mühüm əhəmiyyət kəsb etdiyini vurğulayıb. O, 1988-ci ildən başlayaraq keçmiş SSRİ məkanında münaqişə ocaqlarının yaranması, illərlə formalaşan iqtisadi əlaqələrin pozulması, keçid dövrü üçün xarakterik olan çətinliklər, ölkəmizin üzləşdiyi hərbi təcavüzlə bağlı əhalinin məcburi yerdəyişmələrinin meydana çıxması nəticəsində miqrasiya proseslərinin daha da gücləndiyini söyləyib.

V.Yujanin görüşdən məqsədinin Azərbaycanda müxtəlif kateqoriyalardan olan miqrantların vəziyyəti, onların hüquqlarının təmini ilə tanış olmaqdan ibarət olduğunu deyib. O, miqrantların problemlərinin qlobal xarakter daşıdığını, qaçqın və məcburi köçkünlərin problemləri ilə sıx bağlı olduğunu diqqətə çatdırıb. Qonaq səmimi qəbul və faydalı fikir mübadiləsinə görə E.Süleymanovaya təşəkkürünü bildirmişdir.