Daxili siyasət

Daxili siyasət

BAXCP: Azərbaycan xalqı müqəddəs savaşa hazırlaşmalıdır

26 oktyabr 2009 12:18 (UTC +04:00)

Bakı – APA. Bütöv Azərbaycan Xalq Cəbhəsi Partiyası (BAXCP) İdarə Heyətinin növbəti iclası keçirilib. BAXCP mətbuat xidmətindən APA-ya verilən məlumata görə, iclasda qərarların icrası, ictimai-siyasi vəziyyət, təşkilati və cari məsələlər müzakirə olunub.

Müzakirəyə çıxarılan ilk məsələ Türkiyənin mövcud hakimiyyətinin apardığı siyasət nəticəsində PKK terrorçularının öz separatçı ideyalarını daha sərbəst yaymaq imkanı əldə etmələri və buna qarşı qardaş türk xalqının etirazı olub. BAXCP İdarə Heyəti hesab edir ki, qardaş Türkiyədə PKK terrorçularının zəfər yürüşündən qayıdan “mehmetciklər” kimi qarşılanması baş verənlərin terrorçuların öz məqsədlərinə çatması kimi qavranılmasına əsas verə bilər.

Müzakirə edilən növbəti məsələ Türkiyə ilə Ermənistan arasında münasibətlərin bərpası və inkişafı ilə əlaqədar protokolların imzalanmasından sonra bölgədə yaranmış təhlükəli vəziyyət olub. Bununla bağlı bəyanat qəbul edilib. Bəyanatda deyilir: “Dünyanın super gücü ABŞ-ın Yaxın Şərq və Cənubi Qafqaz siyasəti beynəlxalq hüquqa zidd olmaqla, dünya birliyinin aldadılmasına və bölgənin qana bulanmasına xidmət edir. ABŞ işğal faktına görə Ermənistanla sərhədlərini bağlamış Türkiyəni öz mövqeyindən geri çəkilərək Ermənistanla protokol imzalamağa məcbur edən əsas dövlət olub. BAXCP hesab edir ki, ABŞ ikiüzlü siyasət yürütməməli, Ermənistanla olduğu kimi, İranla da heç bir ilkin şərt irəli sürmədən diplomatik əlaqələr qurmalı, bu dövlətə də maddi və siyasi dəstək verməli, onu yeni texnologiyalarla təmin etməklə geniş ticarət əlaqələri qurmalı və yedəyində sürünən başqa ölkələri də bu cür davranmağa sövq etməlidir. Yalnız bu cür yanaşma ABŞ-ın məntiqi ilə problemin həllinə kömək edə bilər. BAXCP Azərbaycan hökumətini ABŞ-ın siyasətinin əsil mahiyyətini xalqa və bütün dünya birliyinə çatdırmağa, Azərbaycanın ərazi bütövlüyünə qarşı bütün təzyiqləri qətiyyətlə rədd etməyə çağırır. Azərbaycan xalqı qısa müddətdə öz torpaqlarının azadlığı uğrunda müqəddəs savaşa hazırlanmalı, dünya birliyi və islam dünyası bu barədə məlumatlandırılmalı, onlardan kömək istənilməlidir".