Daxili siyasət

Ana səhifə

Daxili siyasət

Qars valisi Mehmet Ufuk Erden: “Ermənistanla sərhədlərin açılması məsələsi gündəmdə deyil”

30 yanvar 2007 11:22 (UTC +04:00)

Qarsa ilk dəfə bu cür nümayəndə heyətinin gəldiyini deyən M.U.Erden bundan məmnunluq duyduğunu bildirib. Türkiyə-Azərbaycan münasibətlərinin yüksək səviyyədə olduğunu qeyd edən vali Qarsın ayrıca bölgə olaraq da Azərbaycanla əlaqələrə önəm verdiyini vurğulayıb. Bakı-Tiflis-Axalkələk-Qars dəmir yolu bağlantısı layihəsinin təkcə iki ölkə arasında əlaqələrə deyil, həm də Qarsın inkişafına müsbət təsir edəcəyini deyən M.U.Erden ticari-iqtisadi əlaqələrin genişlənməsi üçün nəqliyyat yollarının açılmasının vacibliyini söyləyib. APA-nın Bakı-Qars-Bakı birbaşa təyyarə reysinin açılması ilə bağlı sualını cavablandıran vali bu təklifin qüvvədə olduğunu bildirib: “Qars hava limanı Bakıdan havaya qalxan təyyarələri qəbul etməyə hazırdır. Sadəcə, “Azərbaycan Hava Yolları”nın bununla bağlı qərar verməsi gərəkdir”.
Ermənistanla sərhədlərin açılması məsələsinə toxunan M.U.Erden hazırda bunun gündəmdə olmadığını deyib: “Türkiyə ilə Azərbaycan bütün məsələlərdə olduğu kimi, xarici siyasət sahəsində də əməkdaşlıq edir. İki ölkənin xarici siyasət idarələri arasında əldə olunmuş razılığa əsasən, 1993-cü ildə Qarsla Ermənistan arasındakı Akyaka gömrük-keçid məntəqəsi bağlanıb. Sərhədlərin açılması dövlət tərəfindən qəbul olunmuş qərarla həyata keçirilir. Hazırda belə bir qərar olmadığına görə, bu anlaşma qüvvəsində qalır”.
Qarsın ötən əsrin əvvəllərində erməni soyqırımına məruz qalan bölgələrdən biri olduğunu vurğulayan vali burada çoxlu sayda kütləvi məzarlığın olduğunu qeyd edib: “Bu məzarlıqlar ermənilərin türklərə qarşı soyqırımı törətdiyini sübut edir. Təkcə Qarsın Subatan kəndində aşkarlanmış qəbirdə arxeoloji qrup tərəfindən 545 türkün vəhşiliklə öldürüldüyü və dəfn olunduğu müəyyən edilib”.
Qeyd edək ki, Azərbaycanın bir qrup KİV rəhbəri Qars şəhərində Heydər Əliyevin abidəsini ziyarət etdikdən sonra Qarsın bələdiyyə başqanı Naif Əlibəyoğlu ilə görüşüblər. Bundan başqa, səfər proqramına Azərbaycanın Qarsdakı baş konsulluğunun rəhbərliyi ilə görüş, məşhur Qars müqaviləsinin imzalandığı bina ilə tanışlıq, Sarıqamışda şəhid olmuş 90 min türk əsgərinin xatirəsinə ucaldılmış abidənin ziyarət edilməsi daxildir. /APA/