Daxili siyasət

Daxili siyasət

Tatarıstan prezidenti Mintemir Şaymiyevin yanlış tərcümə olunan çıxışı İstanbuldakı beynəlxalq konfransda qalmaqal yaradıb

01 fevral 2007 14:38 (UTC +04:00)

Bu gün İstanbuldakı “Grand Cevahir” Konqres Mərkəzində “Rusiya-İslam dünyası: yeni görüşlər” mövzusunda III beynəlxalq konfrans keçirilib.
APA-nın Türkiyə bürosunun məlumatına görə, beynəlxalq tədbirin Daimi Təşkilat Komitəsinin üzvləri arasında Azərbaycandan professor Vasim Məmmədəliyev, Rusiyadan sabiq xarici işlər naziri Yevgeni Primakov, Qırğızıstandan yazıçı Çingiz Aytmatov da var. Toplantının əvvəlində Türkiyənin baş naziri Rəcəb Tayyib Ərdoğanın və Rusiya prezidenti Vladimir Putinin təbrik məktubları oxunub. Daha sonra konfransda çıxış edən Tatarıstan prezidenti Mintemir Şaymiyev sensasion açıqlamaları ilə yadda qalıb. İslamın tarixindən danışan prezident İstanbulun uzun illər xilafətin paytaxtı olduğunu, Atatürk dövründə İslamı sevməyənlərin mərkəzinə çevrildiyini və son illərdə bu məsələdə müsbətə doğru dönüş olduğunu bildirib. APA-nın Türkiyə bürosu M. Şaymiyevin bu mübahisəli fikirlərinə aydınlıq gətirmək üçün Tatarıstan nümayəndə heyətindən onun çıxışının mətnini əldə edib. Mətndə bu ifadə olduğu kimi yer alıb: “Mustafa Kamal Atatürk dövründə İstanbul İslam əleyhdarlarının mərkəzi halına gəlmişdi”.
APA-nın bununla bağlı sualını cavablandıran Tatarıstan prezidenti isə fikirlərinin düzgün tərcümə olunmadığını bildirib: “Atatürk böyük şəxsiyyətdir. O, bolşevik ideyalarından və 1917-ci il Rusiya inqilabından təsirlənərək, 1923-cü ildə Türkiyə Cümhuriyyətini elan edərkən dini dövlətdən ayırdı. Türkiyə Xilafətdən imtina etdi. Burada dinin dövlətdən ayrılması prosesinin ağrı-acısız keçdiyini iddia edə bilmərik. Ancaq Atatürkün böyüklüyü ondan ibarət oldu ki, Sovetlərdən fərqli olaraq, məscidləri bağlamadı. Ona görə də bu, İslam düşmənçiliyi sayıla bilməz. Mən də çıxışımda Atatürkün dini dövlətdən ayıraraq Türkiyəni müasir dövlətlər sırasına çıxarması prosesində meydana gələn ağrı-acıları nəzərdə tutmuşam”. /APA/