Daxili siyasət

Ana səhifə

Daxili siyasət

ATƏT sədri Migel Anhel Moratinos: “Azərbaycan və Ermənistan rəhbərlərinin münaqişəni sülh yolu ilə nizamlamaq cəhdləri məni qane edir”

14 fevral 2007 14:17 (UTC +04:00)

- Cənab Moratinos, ATƏT sədri kimi ilk addımlarınızdan biri Minsk Qrupunun həmsədrləri ilə görüş olub. Görüşdə hansı məsələlər müzakirə olunub?
- İspaniyanın ATƏT-ə sədrliyi dövründə fəaliyyət prioritetlərindən biri quruma üzv ölkələrdə mövcud münaqişələrin həlli məqsədilə əməkdaşlıq etməkdir. Biz hesab edirik ki, bu və ya digər münaqişəyə cəlb olunan ölkələr prosesin antaqonist tərəfləri olmamalı, eyni mövqedən çıxış etməlidir. Mən ATƏT-in Minsk Qrupunun həmsədrlərini bu məsələdə tam dəstəkləyirəm - münaqişə sülh yolu ilə nizamlanmalı və hər iki tərəfi razı salan həll yolu tapılmalıdır. Son görüşümüzdə həmsədrlər məni fəaliyyət dövrlərində münaqişə tərəfləri ilə əlaqələrinə dair məlumatlandırdılar. Bundan başqa, onlar münaqişənin daha optimal həlli üçün əməkdaşlığa dair fikirlərini mənimlə bölüşdülər.
- Dağlıq Qarabağ münaqişəsi ətrafında yaranmış hazırkı situasiyanı necə qiymətləndirirsiniz?
- ATƏT-in Minsk Qrupu həmsədrləri və şəxsi nümayəndəmlə qeyd etdiyim görüşdən sonra mənzərə mənim üçün daha da aydınlaşıb və münaqişənin nizamlanması prosesi ilə bağlı vəziyyəti qənaətbəxş hesab edirəm. Azərbaycan və Ermənistan rəhbərlərinin münaqişəni sülh yolu ilə nizamlamaq cəhdləri məni qane edir.
- ATƏT sədri kimi Dağlıq Qarabağ münaqişəsinin nizamlanması istiqamətində atacağınız addımları müəyyənləşdirmisinizmi?
- Bir qədər əvvəl qeyd etdim, danışıqlar prosesini yumşaltmaq istiqamətində fəaliyyət göstərmək mənim əsas arzumdur. Ümid edirəm ki, bu il Dağlıq Qarabağ münaqişəsinin tərəfləri olan ölkələrin rəsmi şəxsləri və hökumət nümayəndələri ilə görüşəcəyəm. Məqsədim tərəflərin problemə hansı müstəvidən yanaşmasını bir daha aydınlaşdırmaq və mövcud fikir ayrılıqlarının aradan qaldırılması üçün addımlar atılmasına yardım göstərməkdir.
- Münaqişənin nizamlanmasında nəzərə çarpan tərəqqi baxımından 2006-cı ili necə dəyərləndirirsiniz?
- 2006-cı il Dağlıq Qarabağ münaqişəsinin həllində irəliyə doğru addımlar atılması baxımından pozitiv il olub. Buna görə ATƏT-in Minsk Qrupunun həmsədrlərinə və “Praqa prosesi” çərçivəsində konstruktiv görüşlər keçirən Azərbaycan və Ermənistan prezidentlərinə, xarici işlər nazirlərinə təşəkkürümü bildirirəm. ATƏT ötən ilin dekabrında səslənmiş təşəbbüsləri alqışladığını bəyan edib və münaqişənin nizamlanmasına dair sülh prosesində aktivlik nümayiş etdirilməsini alqışlayıb. Hesab edirəm ki, bu istiqamətdə cəhdlər gələcəkdə də davam etdirilməli, səylər daha da gücləndirilməlidir.
- Bakıya səfərinizin vaxtı dəqiqləşibmi? Bizdə olan məlumata görə, səfəriniz zamanı həm də İspaniyanın Bakıda səfirliyinin açılışı olacaq...
- Azərbaycan və Ermənistana səfərim yəqin ki, bu ilin yayına qədər gerçəkləşəcək. Belə görürəm ki, siz İspaniyanın Azərbaycanda səfirliyinin açılması ilə bağlı ətraflı məlumata maliksiniz. Əminəm ki, bu niyyətimizi 2007-ci ildə həyata keçirə biləcəyik.
- ATƏT-ə sədrlik edəcəyiniz 2007-ci il ərzində fəaliyyət prioritetlərinizi açıqlaya bilərsinizmi?
- ATƏT ərazisində təhlükəsizlik və quruma üzv ölkələr arasında sıx əməkdaşlıq ATƏT-in əsas prinsiplərindən olaraq qalır, İspaniyanın quruma sədrliyi dövründə də bu prinsiplər prioritet təşkil edəcək. Qeyd etdiyim əməkdaşlığa ATƏT üzvü ölkələr arasında sıx və davamlı dialoq nəticəsində nail olmaq mümkündür. Siyasi və hərbi məsələlərə gəldikdə, biz terrorizmə qarşı mübarizəni daha da intensivləşdirməli, terrorizmin qurbanlarına hərtərəfli dəstəyi davam etdirməliyik. İqtisadi və ekoloji kontekstdə isə əsas diqqət torpaq aşınmalarının qarşısını almaq, təmiz və keyfiyyətli içməli su problemini həll etməkdir. İnsan hüquqları məsələsi ilə bağlı isə plüralist cəmiyyətlərdə diskriminasiyanın qarşısını almaq üçün bütün zəruri addımları atacağıq. /APA/