Daxili siyasət

Ana səhifə

Daxili siyasət

ADP-nin Sərdar Cəlaloğlunun rəhbərlik etdiyi hissəsi Rəsul Quliyevi partiyadan xaric edib

19 fevral 2007 15:25 (UTC +04:00)

APA-nın məlumatına görə, bu barədə Sərdar Cəlaloğlu bildirib. Onun sözlərinə görə, R. Quliyev partiyada yaratdığı qeyri-sağlam şərait, partiya sədri kimi öz vəzifəsindən sui-istifadə etdiyi, parçalanma yaratdığı, Nizamnaməyə hörmətsiz yanaşdığı, üzvlər arasında nifaq yaratdığına görə partiyadan xaric edilib: “Rəsul Quliyevin bu cür acı sonluğa gəlməsi onun şəxsi nöqsanları ilə bağlıdır. Təəssüf ki, o yalnız qrup maraqları baxımından çıxış edib. Təşkilat Komitəsinin üzvü Taliyət Əliyev mənim Təşkilat Komitəsi sədrliyindən və sədrliyə namizədlikdən imtina etməyimlə bağlı Rəsul Quliyevə məlumat vermək üçün ona zəng edib. Amma Rəsul Quliyevin ona cavabı sərt olub. O, Taliyət bəyə “sən mənim nökərimin nökəri olmaq istəyirsən?” deyib. Yəni o, mənə öz nökəri kimi baxırmış”. S. Cəlaloğlu Zəminə Dünyamalıyeva, Solmaz Ələsgərova, Yaqub Abbasov və Jalə Cəfərovanın da partiyadan xaric edilməsi haqda qərar qəbul edildiyini bildirib. ADP-nin Rəsul Quliyevin rəhbərlik etdiyi hissəsində təmsil olunan digər şəxslərin məsələsinə isə rayon təşkilatlarında baxılacaq. Partiyanın seçkili orqanlarının yanvarın 27-dən buraxıldığını bildirən S. Cəlaloğlu buna görə də ötən bazar KXCP-nin qərargahında Ali Məclis adı altında iclasın keçirilməsinin qanuna və Nizamnaməyə zidd olduğunu bildirib. O, yalnız R. Quliyevə yaxın bir neçə şəxsin toplantı keçirməyə cəhd etdiyini söyləyib: “Rəsul Quliyev özü rayon təşkilatlarına zəng edib və deyib ki, guya biz YAP-ın namizədini dəstəkləyib, YAP-a birləşmək qərarı vermişik. Təbii ki, bu yalana çox adam inanmayıb, çünki bunlar hamısı böhtandır. 62 rayon təşkilatından 42-si bizə rəsmi müraciət edərək, həmin toplantını boykot etdiklərini və bizimlə bir yerdə olduqlarını bildiriblər”.
S. Cəlaloğlunun sözlərinə görə, ADP adı uğrunda heç kim onunla mübarizə apara bilməz: “Nə Rəsul Quliyev, nə Aydın Quliyev, nə də Akif Şahbazovun indiki halda ADP-yə aidiyyatı yoxdur. Onların mənşəyi də ADP ilə bağlı deyil, YAP mənşəli adamlardır. ADP-də olanda da onlar demokratlarla bir yerdə olmayıblar, qrup şəklində fəaliyyət göstəriblər”.
S. Cəlaloğlu qurultayda sədrliyə namizədliyini verəcəyini istisna etməyib: “Mən qurultaya namizədliyimi irəli sürəcəyimlə bağlı fikir səsləndirdikdən sonra gördüm ki, Rəsul Quliyev qorxur. Çünki sonuncu qurultayda 600 qurultay nümayəndəsindən cəmi 200 nəfər ona səs vermişdi. Özü də o zaman alternativsiz namizəd olmuşdu”. S. Cəlaloğlu qarşı tərəfi ADP kimi təqdim edən mətbuat orqanları ilə bağlı məhkəməyə müraciət olunacağını da qeyd edib. Onun sözlərinə görə, hazırda partiyanın möhürü, şəhadətnaməsi və bütün digər rəsmi sənədləri özündədir.
ADP-nin R. Quliyevin sədrlik etdiyi Qurultaya Hazırlıq üzrə Təşkilat Komitəsinin üzvü Akif Şahbazov isə APA-ya açıqlamasında S. Cəlaloğludan bundan ağıllı qərar gözləməyin mümkün olmadığını bildirib: “Belə bir qərarın nə dünya, nə də Azərbaycan siyasətində analoqu olmayıb. Qurultay tərəfindən sədr seçilmiş şəxsin bir qrup adam tərəfindən xaric olunması dünya praktikasında olmayıb. Onların Təşkilat Komitəsi adından danışmaq səlahiyyəti yoxdur. Belə bir qərarın qəbul olunması isə yalnız gülüş doğurur”./APA/