Daxili siyasət

Ana səhifə

Daxili siyasət

“Güney Azərbaycan türklərinin Ana Dili” mövzusunda dəyirmi masa keçirilib

20 fevral 2007 13:57 (UTC +04:00)

Bu gün Beynəlxalq Ana Dili Günü münasibətilə “Güney Azərbaycan türklərinin Ana Dili” mövzusunda dəyirmi masa keçirilib. APA-nın məlumatına görə, tədbir Bütöv Azərbaycan Xalq Cəbhəsi Partiyası (BAXCP) və Dilarə Əliyeva adına Qadın Hüquqlarının Müdafiə Cəmiyyəti tərəfindən təşkil olunub. Tədbirdə ilk olaraq çıxış edən Güney Azərbaycan İnformasiya Agentliyinin rəhbəri Əli Süleymani İranda Beynəlxalq Ana Dili Günü münasibətilə keçirilən tədbirlərdə həbs olunan azərbaycanlılar haqda məlumat verib. Onun sözlərinə görə, bu günlə əlaqədar İranın azərbaycanlılar yaşayan Urmiya, Qum, Əhər, Təbriz və digər şəhərlərində aksiyalar keçirilir.
Dilin Azərbaycan xalqının ağrılı problemi olduğunu deyən professor Almaz Əliqızı bu sahədə əsas problemi İranda yaşayan azərbaycanlıların yaşadığını bildirib. O, dilin məhdudlaşdırılmasının qarşısının alınması üçün xalqın maariflənməsinə ehtiyac olduğunu, bunun üçün isə ziyalılar və tarixçilərdən ibarət “beyin mərkəzi” yaradılması təklifini irəli sürüb.
BAXCP sədri, millət vəkili Qüdrət Həsənquliyev Beynəlxalq Ana Dili Gününün hər il dövlət səviyyəsində qeyd edilməsinin vacibliyini vurğulayıb: “Dilimizi yaşatsaq, bir millət olaraq həmişə var olacağıq. Bütün türk xalqlarının dillərini inkişaf etdirmək və bununla da vahid türk dili yaradılmasına nail olmağa çalışmalıyıq. Bu sahədə dövlətin və siyasətçilərin üzərinə böyük işlər düşür”. Q. Həsənquliyev İranda yaşayan azərbaycanlılara dəstək olmaq üçün Azadlıq meydanında Babəkin abidəsinin ucaldılması və onun adını daşıyan prospektin həmin meydana kimi uzadılması təklifi ilə çıxış edib. O, həmçinin Azərbaycan xalqını ikiyə bölən Araz çayı üzərində Xüdafərin adlı paytaxt şəhərin salınacağına inandığını bildirib. Tədbirin sonunda Birləşmiş Millətlər Təşkilatı və İranın ali dini lideri ayətullah Xamneyiyə müraciət edilməsi qərara alınıb. /APA/