Daxili siyasət

Ana səhifə

Daxili siyasət

Komidə Azərbaycan mədəniyyəti günləri keçiriləcək

21 fevral 2007 08:40 (UTC +04:00)

Azərbaycan nümayəndə heyətinin Komi Respublikasına səfərində əsas məqsəd regionda yaşayan soydaşlarımızın problemlərinin həlli, diasporun formalaşması və Azərbaycanla Komi arasında müxtəlif sahələrdə ikitərəfli əlaqələrin inkişafı olub. Azərbaycanın Sankt-Peterburqdakı Baş Konsulluğundan APA-ya verilən məlumata görə, Azərbaycan nümayəndə heyətinə rəhbərlik edən ölkəmizin Sankt-Peterburqda baş konsulu Qüdsi Osmanov Komi Respublikasının Dövlət Şurasının sədri Vladimir Torlopov ilə görüşüb. Görüşdə Kominin daxili işlər naziri V. Silayev və Federal Miqrasiya Xidmətinin rəhbəri V. Maksimov iştirak edib. Görüş zamanı Q. Osmanov və V. Torlopov Komi ilə Azərbaycan arasında iqtisadi, sosial, mədəni və digər sahələrdə ikitərəfli əlaqələrin inkişafı və Azərbaycanın dinamik surətdə inkişaf edən iqtisadiyyatına artan maraq çərçivəsində gələcək perspektivləri müzakirə olunub.
Görüşdə cari ilin ikinci yarısında Komidə 850 nəfərlik Opera və Balet Teatrında Azərbaycanın və yerli mədəniyyət və incəsənət xadimlərinin iştirakı ilə “Azərbaycan günləri” adlı tədbirin keçirilməsi təklifi bəyənilib. Vladimir Torlopov Komidə çoxsaylı xalqların mövcud olduğunu vurğulayıb, iri neft və qazçıxarma sənaye şəhərlərindən sayılan Vorkuta, Uxta və Usinskdə çoxlu sayda azərbaycanlıların yaşadıqlarını qeyd edib.
Görüşdə Kominin Sıktıvkar, Vorkuta, Uxta və Usinsk şəhərlərinin Azərbaycanın şəhərləri ilə qardaşlaşması təklifi irəli sürülüb və bu təklif dəstəklənib. Bundan başqa səfər çərçivəsində baş konsul Qüdsi Osmanovun təkbətək formatda Komi Respublikasının daxili işlər naziri V. Silayev və Federal Miqrasiya Xidmətinin rəisi V. Maksimov, Komi Respublikasının prokuroru A. Şuklin ilə görüşləri olub və Komidə yaşayan azərbaycanlıların leqallaşma prosesi müzakirə olunub. Baş konsulun Komi Parlamentinin sədr müavini A. Beznosikov və mədəniyyət və milli siyasət naziri N. Bobrova ilə görüşlərində respublikada Azərbaycan dilində bazar günü məktəblərinin açılması, mədəniyyət günlərinin keçirilməsi, tələbə mübadiləsi məsələləri müzakirə olunub. Qeyd edək ki, Azərbaycan nümayəndə heyətinin tərkibinə ölkəmizin Sankt-Peterburqda baş konsulu Qüdsi Osmanov, Azərbaycanın Sankt-Peterburqda Baş Konsulluğunun konsulu Günəş Rüstəmzadə, Ümumrusiya Azərbaycanlılar Konqresinin sədr müavini Gündüz Həmzəyev, Rusiyada Azərbaycanlıların Milli-Mədəni Muxtariyyəti təşkilatının Sankt-Peterburq bölməsinin icraçı direktoru Akif Qasımov və Azərbaycan Milli Konqresinin Arxangelsk regional bölməsinin rəhbəri Cəmil Əliyev daxil olub. /APA/