Daxili siyasət

Ana səhifə

Daxili siyasət

“Azadlıq” bloku ADP daxilində parçalanmanın qarşısını ala bilməsə, hər iki tərəflə əməkdaşlıq edəcək

22 fevral 2007 10:42 (UTC +04:00)

“Azadlıq” bloku Azərbaycan Demokrat Partiyası (ADP) daxilində parçalanmanın qarşısını ala bilməsə, hər iki tərəflə əməkdaşlıq edəcək. Bu barədə APA-ya “Azadlıq” blokundakı mənbələrdən bildirilib. Məlumata görə, blokun Sədrlər Şurasının dünən keçirilən iclasında bununla bağlı ilkin razılaşma da əldə olunub. Razılaşmaya əsasən, blok ADP ilə yanaşı, yeni statuslu siyasi partiya ilə də əməkdaşlıq edəcək. Mənbə onu da bildirib ki, blokun təsisçiləri məsələ ilə bağlı Rəsul Quliyevlə də danışıb, yaranmış situasiyanı izah ediblər.
Sərdar Cəlaloğlunun rəhbərlik etdiyi ADP-nin Qurultaya Hazırlıq üzrə Təşkilat Komitəsinin üzvü Həsrət Rüstəmov isə APA-ya açıqlamasında “Azadlıq” blokunda fərqli müzakirələrin aparıldığını deyib: “Sərdar Cəlaloğlunun təklifi ilə Akif Şahbazov blokun Sədrlər Şurasının iclasına çağırılıb və təklif olunub ki, onlar ADP adından imtina etsinlər. Bu halda, blok başqa partiya adı altında onlarla da əməkdaşlıq edəcək”.
Rəsul Quliyevin rəhbərlik etdiyi ADP-nin Qurultaya Hazırlıq üzrə Təşkilat Komitəsinin sədr müavini Akif Şahbazov isə APA-ya açıqlamasında “Azadlıq” blokunun Sədrlər Şurasının iclasında ona partiya adından imtina edilməsi barədə hər hansı təklifin olmadığını bildirib: “İclasda müzakirə olunan məsələlərin əsas mahiyyəti odur ki, cəmiyyətə tərəf kimi təqdim olunan ADP-çilər barışıq limitinin bitmədiyini açıqlayıblar. Rəsul Quliyevlə Sərdar Cəlaloğlu partiyada baş verənləri yenidən müzakirə edə bilər”. /APA/