Daxili siyasət

Ana səhifə

Daxili siyasət

Bernar Fasie: “Azərbaycan və Ermənistan xarici işlər nazirlərinin görüşü martın 14-də Cenevrədə keçiriləcək”

07 mart 2007 18:24 (UTC +04:00)

APA-nın məlumatına görə, B. Fasye hava limanında jurnalistlərə bildirib ki, regiona təkcə fransalı həmsədr kimi deyil, digər həmsədrlərin də təmsilçisi kimi gəlib: “Həmsədrlərin regiona ayrı-ayrılıqda səfər etməsində qeyri-adi heç nə yoxdur. Bunun həmsədrlər arasında fikir ayrılığı kimi yozulması düzgün deyil. Mənim səfərim barədə həmsədrlər arasında iki həftə əvvəl Parisdə keçirilən məsləhətləşmələrdə qərar qəbul edilib”. Azərbaycan və Ermənistan xarici işlər nazirlərinin növbəti görüşünün martın 14-də Cenevrədə keçiriləcəyini deyən fransalı həmsədr martın 13-də digər həmsədrlərlə görüşüb məsləhətləşmələr aparacağını söyləyib.
Bu gün Ermənistanda prezident Robert Köçəryanla görüşdüyünü deyən B. Fasie sabah Azərbaycan prezidenti ilə danışıqlar aparacağını qeyd edib: “Görüşdə danışıqlar prosesinin perspektivləri, gələcək addımlar barədə müzakirələr aparacağıq”. Prezidentlərin Minskdə keçirilən görüşündə müzakirə olunmuş detalları ətraflı araşdıracaqlarını diqqətə çatdıran B. Fasie keçirilən görüşlərin “Praqa prosesi”nin davamı kimi qiymətləndirilməsi ilə razılaşmayıb: “Praqa görüşü 2 il yarım əvvəl keçirilib. O vaxtdan həm xarici işlər nazirləri, həm də prezidentlər arasında xeyli görüş olub, danışıqlar intensivləşib, prosesdə dəyişikliklər baş verib. Odur ki, danışıqların “Praqa prosesi”nin davamı olduğunu demək düzgün deyil”. B. Fasie vasitəçilərin rolunun danışıqlar prosesinə yardım etmək olduğunu deyib, münaqişənin həllinə dair qərarı prezidentlərin verməli olduğunu söyləyib. Azərbaycan və Ermənistan prezidentlərin görüşünə gəlincə, fransalı həmsədr bu görüşün Ermənistandakı parlament seçkilərindən sonra keçiriləcəyini vurğulayıb. /APA/