Daxili siyasət

Daxili siyasət

Xələf Xələfovun rəhbərlik etdiyi nümayəndə heyəti Hindistanda məsləhətləşmələr aparıb

17 mart 2007 12:29 (UTC +04:00)

Xarici işlər nazirinin müavini Xələf Xələfovun rəhbərlik etdiyi nümayəndə heyəti Hindistanda səfərdə olub. XİN Mətbuat Mərkəzindən APA-ya verilən məlumata görə, nümayəndə heyəti Nyu-Dehlidə yerləşən “PHD House”-da keçirilən Azərbaycan iqtisadiyyatına həsr edilmiş təqdimat mərasimində iştirak edib. Hindistanın işgüzar dairələrinin nümayəndələri qarşısında çıxış edən nazir müavini Azərbaycanın Hindistanla əlaqələrinin inkişafında maraqlı olduğunu qeyd edərək, ölkəmizdə həyata keçirilən irimiqyaslı beynəlxalq və regional layihələr, ölkə iqtisadiyyatına qoyulmuş xarici sərmayələr, Azərbaycanın dünya və Avrora bazarlarına inteqrasiyası barədə məlumat verib, ölkəmizin Hindistanla ticarət və iqtisadi əlaqələri genişləndirmək arzusunda olduğunu bildirib.
X. Xələfov Hindistan XİN-in Şərq üzrə katibi N. Ravi ilə XİN-lərarası məsləhətləşmələr keçirib, Azərbaycanla Hindistan arasında həm ikitərəfli, həm də çoxtərəfli əməkdaşlığa dair fikir mübadiləsi aparıb. Nazir müavini Ermənistan-Azərbaycan, Dağlıq Qarabağ münaqişəsi barədə də məlumat verib, Azərbaycanın ədalətli mövqeyini çatdırıb. Azərbaycan nümayəndə heyəti məsləhətləşmələr zamanı, ölkəmizin Hindistandakı səfirliyi üçün Nyu-Dehlidə bina tikilməsindən ötrü torpaq sahəsi ayrılması məsələsini də qaldırıb.
Nümayəndə heyəti Hindistanın xarici işlər üzrə dövlət naziri E. Ahamedlə də görüşüb. Görüşdə Azərbaycanla Hindistan arasında münasibətlərin inkişafına, eyni zamanda beynəlxalq təşkilatlarda mövqelərin qarşılıqlı dəstəklənməsinə dair geniş fikir mübadiləsi aparılıb.
Hindistanın Ticarət və Sənaye Nazirliyində ticarət üzrə dövlət naziri Cayram Rameşlə görüş zamanı Azərbaycan və Hindistan arasında hökumətlərarası ticarət, iqtisadi və elmi əməkdaşlıq üzrə işçi komissiyanın yaradılmasına dair sazişin imzalanmağa hazır olduğu bildirilib, bu məqsədlə C. Rameşin Bakıya səfərinin tarixi təsdiq olunub. Bununla yanaşı, iki ölkə arasında ticarət-iqtisadi əlaqələrin böyük potensialı vurğulanaraq, bu əlaqələrin yeni səviyyəyə qaldırılmasına dair fikir mübadiləsi aparılıb. /APA/